Օրերս դերասանուհի Լիկա Սալմանյանը երևանյան ակումբներից մեկում նշել է իր ծննդյան 21-րդ տարեդարձը, ինչի ժամանակ արված լուսանկարները լայն տարածում գտան համացանցում: Այդ լուսանկարներից, թերևս, ամենից շատ քննարկվողը դարձավ Լիկայի և «Ինդիվիդում քասթինգ փրոդաքշենի» հիմնադիր Աշոտ Սարգսյանի համատեղ լուսանկարը, ում հետ արդեն որոշ ժամանակ է, ինչ Լիկային սիրավեպ են վերագրում, ինչն էլ երեկ կայքերից մեկին տված հարցազրույցում վերջապես հաստատեց է Աշոտ Սարգսյանը:
Asekose.am-ը կապ հաստատեց Լիկա Սալմանյանի հետ՝ ճշտելու, թե արդյո՞ք իրենց հարաբերությունները վաղուց են, ինչ ձևավորվել են և թե ի՞նչն էր այդ ամենը գաղտնի պահելու իրենց որոշման պատճառը:
«Ոչինչ գաղտնի չէր պահվում, պարզապես դրա մասին չէր խոսվում: Սա մեր անձնականն է, իսկ այն, ինչը կոչվում է անձնական, պատկանում է միայն մեզ երկուսիս»,- ասաց Լիկա Սալմանյանը:
Դիտարկմանը, որ մինչ այս նրանք երկուսով ոչ հաստատում և ոչ էլ հերքում էին իրենց սիրավեպին վերաբերող լուրերը, Լիկան պարզաբանեց.
«Նորից եմ կրկնում, մենք գաղտնի ոչինչ չենք պահել: Ես ավելացնելու գրեթե ոչինչ չունեմ, քանի որ Աշոտն ասել է այն, ինչն այս փուլի համար բավական է»:
Հարցին՝ արդյո՞ք, այնուամենայնիվ, իրենց հարաբերությունների մասին հենց այս պահին խոսելը եղել է իրենց երկուսի որոշումը, Լիկան պատասխանեց, որ այս թեմայով իրենց երկուսի միջև կոնկրետ խոսակցություն չի եղել.
«Հատուկ ոչինչ չի որոշվել, պարզապես Աշոտը խոսեց մեր երկուսի փոխարեն, ասեց այնքան բան, որքան որ պետք էր: Այլ փակագծեր բացելու, կարծում եմ, կարիք չկա, որովհետև մարդկանց հետաքրքրող հարցին՝ մենք միասին ենք, թե՝ ոչ, Աշոտն արդեն պատասխանել է և այժմ էլ ես եմ դա հաստատում»,- նշեց Լիկա Սալմանյանը:
Վերջինս, սակայն, գերադասեց այլ մանրամասնել չհաղորդել, չցանկացավ պատասխանել, թե արդեն որքա՞ն ժամանակ է, ինչ նրանք հանդիպում են և թե արդյո՞ք նրանք մտադրություն ունեն մոտ ապագայում օրինականացնել իրենց հարաբերությունները:
Մեզ հետ զրույցում Լիկան անդրադարձավ նաև այն բոլոր բացասական մեկնաբանություններին, որոնք որ հայտնվեցին համացանցում: Ինչպես նշեց դերասանուհին՝ իրենց հարաբերությունների մասին ավել տեղեկություն չհաղորդելը կապված է նաև այս հանգամանքի հետ.
«Կարդալով երեկ համացանցում հայտնված Աշոտի հարցազրույցի մեկնաբանությունները՝ որոնցից ոչ մեկում չէր հնչում ոչ իմ ծննդյան տարեդարձի, և ոչ էլ մեր հարաբերությունների հետ կապված շնորհավորանքներ, անիմաստ եմ համարում այդ մեկնաբանությունները թողնող մարդկանց ավել արտահայտվելու առիթ տալ, քանի որ չգիտեմ հասկանալով, թե ոչ՝ նրանք պարզապես վիրավորում են իրենց դիմացինին, խոսքն, իհարկե, ոչ բոլորի մասին է»,- նշեց Լիկա Սալմանյանը:
Հարցին՝ թե հատկապես ի ՞նչ բովանդակությամբ մեկնաբանություններն են նրան վիրավորել, արդյո՞ք դրանք կապ ունեն Աշոտի՝ նախկինում ամուսնացած լինելու և երկու երեխա ունենալու փաստի հետ, Լիկան ասաց.
«Կցանկանամ նշել, որ խոսքն այս ամենի մասին չէ: Կային անիմաստ մեկնաբանություններ, որոնք ինձ վիրավորում են և, կարծում եմ, որ կվիրավորեն ցանկացած նորմալ մարդու: Խոսքս այն պարապ մարդկանց մասին է, ովքեր իրենց ժամանակը սպառելու համար գրում են մեկնաբանություններ՝ չմտածելով անգամ, որ դրանով չափից դուրս վիրավորում են տվյալ անձին: Կասեմ միայն, որ այդ գրողները ադեկվատ, նորմալ մարդիկ չեն, որովհետև արտահայտվել նման կերպ, կարծում եմ, գիտակից մարդն իրեն թույլ չի տա: Բայց այս ամենով հանդերձ՝ շնորհակալ եմ այն մարդկանց, ովքեր շնորհավորել և երջանկություն են մեզ մաղթել»,- ասաց Լիկա Սալմանյանը:
Անդրադառնալով այն խոսակցություններին, ըստ որոնց՝ հենց ինքն է հանդիսացել Աշոտի ամուսնալուծության պատճառը, Լիկան մեկնաբանեց.
«Ամբողջ հարցը նրանում է, որ մարդիկ, չունենալով անհրաժեշտ և ճշգրիտ տեղեկություն, թույլ են տալիս իրենց կարծիք հայտնել, ավել-պակաս խոսել: Աշոտը վաղուց է, ինչ ամուսնալուծված է. չեմ կարծում, որ դրանում ինչ-որ վատ կամ հանցալի բան կա, դա ոչ մեկի խնդիրը չէ: Իսկ ես նրան հանդիպել եմ ամուսնալուծությունից որոշ ժամանակ հետո: Եթե Աշոտը բացահայտ խոսում է մեր հարաբերությունների մասին, նշանակում է, որ նա արդեն ամուսնալուծված է: Ինչու եմ սա շեշտում, որովհետև հանդիպել եմ այնպիսի մեկնաբանությունների, որոնց համաձայն՝ Աշոտը ներկայումս ամուսնացած է: Պարզից էլ պարզ է, որ եթե մարդը խոսում է, հայտարարություն է անում, նշանակում է՝ նա արդեն ամուսնալուծված է»,- նշեց Լիկան:
Իսկ թե դերասանուհին ի՞նչ հարաբերությունների մեջ է գտնվում Աշոտի երեխաների հետ, Լիկան չցանկացավ պատասխանել՝ ասելով.
«Չեմ ցանկանում դրա մասին խոսել, կարիքը չկա»:
Զրույցի վերջում խոսելով իր և Աշոտի՝ տասնհիինգ տարվա տարիքային տարբերության մասին՝ Լիկան նկատեց.
«Մեր տարիքային տարբերությունը մեզ բոլորովին չի խանգարում: Չգիտեմ ինձանից է, թե՝ ոչ, բայց հիմնականում իմ տարիքային խմբին պատկանող աղջիկներն ավելի մանկական են, իսկ ես այդպիսի չեմ: Այդ պատճառով իմ հասակակից տղաներն ինձ հետաքրքիր չեն, այդքան հասուն չեն, իսկ ես անլուրջ տղաներին տանել չեմ կարողանում»,- Asekose.am-ի հետ զրույցում նշեց դերասանուհի Լիկա Սալմանյանը:
Հեղինակ՝ Ա. Մաթևոսյան
