«Ձմեռը լարված սկսեց, իսկ հիմա մենք սպասում ենք թեժացումների՝ կապված Սումգայիթի, Բաքվի ջարդերի հետ»,-այսօր՝ լրագրողների հետ հանդիպման ժամանակ ասաց ադրբեջանագետ Գրիգորի Այվազյանը:
Նրա խոսքով՝ Թուրքիայի վարչապետ Դավութօղլուն օրես Բաքու կատարած այցի ժամանակ խոսելով Ալիևի հետ՝ հավաստիացրեց նրան, որ ճիշտ ժամանակն է՝ գործել ղարաբաղյան ռազմաճակատում, քանի որ Ռուսաստանը Սիրիայի, Ուկրաինայի հետ կապված խնդիրներով է զբաղված.
«Բացի այդ՝ Թուրքիան սեփական օրինակով ցույց տվեց, որ կարելի է խոցել ռուսական ինքնաթիռն ու անպատիժ մնալ: Պետք է հաշվի առնել նաև այն, որ Ադրբեջանում ընտրություններից հետո աճող դժգոհության, տնտեսական վատ պայմանների առկայության պարագայում ադրբեջանական ֆաշիստական ռեժիմը այլ ելք չի տեսնում, քան թե ռազմաճակատում իրավիճակը սրելը»,-նկատեց ադրբեջանագետը:
Սրացում կարձանագրվի նաև այս ամսին Հայաստանի և Ադրբեջանի նախագահների հանդիպման պարագայում.
«Այդ հանդիպումից ոչ մի դրական շարժ պետք չէ ակնկալել: Ադրբեջանը օգտվելով այս հանդիպումից՝ նոր, լայնամասշտաբ ռազմական գործողություն կհրահրի:
Ադրբեջանը բոլոր տարիներն օգտագործել է նոր, մեծ պատերազմի նախապատրաստվելու համար: Ադրբեջանի կողմից նախապատրաստվող ագրեսիայի հետ է կապված նաև վերջերս իրավապաշտպաններ Լեյլա և Արիֆ Յունուս ամուսիններին բանտից հանելու և տնային կալանքի ենթարկելու փաստը: Ուզում են ցույց տալ, թե ժողովրդավար երկիր են, և Հայաստանն ու Ադրբեջանը նույն հարթության վրա պետք է դիտարկվեն ու պատերազմի դեպքում տարբերություն պետք չէ դնել»,-նշեց նա:
Ադրբեջանագետը կարծում է, որ Հայաստանը պետք է Ադրբեջանի նման փակի ռազմաճակատում տիրող իրավիճակի մասին տեղեկատվությունը:
«Դա բացի խուճապից ոչինչ չի տալիս»:
Անի Կարապետյան
