Ազգային ժողովի հավաքարարները այսօր կրկին շարունակում են բողոքի ակցիա իրականացնել՝ պահանջելով իրենց վճարել նախկին պայմանագրով սահմանված աշխատավարձը։ Ըստ նրան՝ աշխատավարձերը անհիմն են իջեցրել, ավելին՝ նախապես չի ասվել, որ աշխատավարձ է իջնելու, նոււյնիսկ խոստացել էին, որ փոփոխություններն ամենևին աշխատավարձի վրա չեն ազդելու։
Նրանք իրենց բողոքը ներկայացրին Ազգային ժողովի ԲՀԿ–ական փոխնախագահ Վահե Էնֆիաջյանին։ Էնֆիաջյանն էլ հորդորեց կոնտակտներ թողնել, որպեսզի նիստից հետո կարողանա խնդրի շուրջ խոսել նրանց հետ:
Հիշեցնենք, որ Ազգային ժողովի մաքրությունն իրականացնող «ՔԼԻՆԵՐՍ» ՍՊ ընկերությունը առաջարկել է մաքրուհիներին աշխատել 40 հազար դրամով նախկին 67 հազար դրամի փոխարեն, սակայն ընկերությունը խոստացել է աշխատանքով ապահովել նաեւ այլ հաստատություններում։ Հավաքարարները սրան դեմ են, սպառնում են ապրիլի 1-ից այլեւս աշխատանքի չգալ, եթե իրենց խնդրին լուծում չտրվի։
