«Իշխանությունը պահելու համար ուղղակի անհրաժեշտ էր սահմանադրական փոփոխություն կատարել, այլ ելք չկար.անգամ իշխանությունը կդադարեր ինքն իր մասին մտածել: Սա իշխանությունը պահելու կամ երկարաձգելու մեխանիզմ է, որն իրեն չի արդարացնի»,-այս կարծիքին է քաղաքական գիտությունների դոկտոր Հայկ Մարտիրոսյանը:
Նրա հետ միակարծիք չէ ԱԺ ՀՀԿ խմբակցության պատգամավոր Արտակ Դավթյանը.
«Սահմանադրական փոփոխություններն իրենց ծավալով այնպիսին են, որ կարելի է ասել՝ հեղափոխություն վերևից: Ձգտում ենք ունենալ կառավարման արդյունավետ համակարգ, իրավունքի գերակայություն: Նույնիսկ ընդդիմադիր դիրքում հանդես եկող Հայ հեղափոխական դաշնակցություն կուսակցությունն է աջակցում սահմանադրական բարեփոխումներին» ,-նշում է պատգամավորը:
Քաղաքագետը հակադարձում է.
«Պառլամենտական համակարգում դժվար է կառավարել այն մեթոդներով, որոնցով որ կառավարվել է ՀՀ-ն վերջին 25 տարիներին: Ինչ-որ պահի Գործադիր իշխանության ղեկավարը դուրս կգա վերահսկողությունից ու կսկի ինքնուրույն խաղալ: Բացառված չէ, որ պատգամավորները իշխանափոխություն կանեն ու խորհրդարան կբերեն նոր ուժեր: Ինչ վերաբերում է ՀՅԴ-ին, ապա այն հասկանում է, որ խորհրդարանական մոդելը լավագույն է և միակ ճանապարհն է դեպի ժողովրդավարություն: Չեմ բացառում, որ ակնակալիք ունեն ընդգրկվել հաջորդ կառավարությունում»:
Անի Կարապետյան
