Այսօր՝ նոյեմբերի 21-ին, Արագածոտնի մարզ կատարած այցի ժամանակ ՀՀ վարչապետի պաշտոնակատար Նիկոլ Փաշինյանը խոսել է առաջիկա ընտրություններում ընտրակաշառք բաժանելու մասին.
«Աստված մի արասցե, եթե որևէ տեղ ընտրակաշառք բաժանելու փորձ արվի և ես այդ տեղեկատվությունն իմանամ ոչ թե իրավապահ մարմիններից, այլ մամուլից: Կարծում եմ՝ ցանկացած այդպիսի մտադրության մասին ՀՀ ոստիկանությունը պետք է ունենա օպերատիվ տեղեկություններ և կանխարգելման, պրոֆիլակտիկայի մակարդակում»,- նշել է Նիկոլ Փաշինյանը:
Փաշինյանը նաև նկատել է.
«Հայաստանում ընտրությունների ժամանակ «ասողների» ինստիտուտ է եղել: Ընդհուպ սեփականատերերը իրենց ընկերություններում աշխատող մարդկանց, համայնքի ղեկավարներն իրենց գյուղերում ապրող մարդկանց հրավիրում են և փորձում են ինչ-ինչ լծակներով ուղղորդել կոնկրետ քվեարկության: Սա ևս պետք է արմատախիլ արվի: Մեր խնդիրն է արձանագրել, որ ՀՀ յուրաքանչյուր քաղաքացի ի վիճակի է առանց կողմնակի օգնության անել իր ընտրությունը: Անթույլատրելի է նման բանը և անհարգալից վերաբերմունք է մարդկանց նկատմամբ և էական չէ սպառնալով, թե խնդրելով է դա արվում»,- ասել է վարչապետի պաշտոնակատարը:
