«Այնպես չէ, որ այսօր Հայաստանում ընդդիմություն գոյություն չունի, ուղղակի ընկալումն այլ է`տարբերվում է մինչև փետրվարի 20-ը եղած ընկալումից»,- այսօր լրագրողների հետ հանդիպման ժամանակ ասաց ԱԺ «Ժառանգություն» խմբակցության պատգամավոր Թևան Պողոսյանը:
Ըստ նրա, մինչև փետրվարի 20-ը ընդդիմադիր դաշտում գործող քաղաքական ուժերի միջև ինչ-որ չափով կար կոնսոլիդացված մոտեցում. նրանց առաջնորդները տարբեր տեսակետներ ունենալով՝ փորձել էին միասին ճանապարհ անցնել:
«Հիմա այնպիսի իրավիճակ է, որ ընդդիմադիրներն ամեն տեղ պետք է առանձին-առանձին ճանապարհով գնան: Հիմա կարծում եմ, որ կոնսոլիդացում պետք կլինի՝ հաշվի առնելով երկրի ապագա զարգացումը»,- ընդգծեց պատգամավորը։
Ինչ վերաբերում է ԲՀԿ-ի ընդդիմություն հայտարարելուն, Թևան Պողոսյանն ասաց, որ դա պետք է ապացուցեն իրենց աշխատանքով: «Երիտասարդ թիմ է, որը կարող է իսկապես աշխատել և իր գործով ընկալելի դառնալ»,-ասաց Թևան Պողոսյանը:
Պատասխանելով հարցին, թե արդյո՞ք եռյակի ձևաչափը կվերականգնվի, պատգամավորը նախ ասաց, որ ինքը հոկտեմբերից եռյակում չկա, ապա հավելեց. «Ապագան ցույց կտա: Գուցե եռյակ չլինի, հնգյակ լինի, քանի որ արդեն հինգ ընդդիմադիր ուժ կա Ազգային ժողովում»:
