Փետրվարի 11-ին` ժամը 13:00-ին, Երևանի Աբովյան 3 հասցեում գտնվող պատմամշակութային հուշարձան-շենքերի մոտ տեղի կունենա բողոքի ցույց՝ ի պաշտպանություն Արտասահմանյան երկրների հետ մշակութային կապերի և համագործակցության հայկական ընկերության ԱՕԿՍ-ի շենքի և դրան հարակից պատմամշակութային հուշարձանների: Բողոքի ակցիայի կազմակերպիչներն ակնկալում են ՀՀ մշակույթի նախարար Հասմիկ Պողոսյանի ներկայությունը կազմակերպվող միջոցառմանը, որի ընթացքում նա կարտահայտի իր պաշտոնական դիրքորոշումը: Հակառակ դեպքում բողոքի ցույցը շարունակվելու է մշակույթի նախարարության դիմաց:
Այս մասին «ԷկոԼուր»-ին հայտնել է «Թեղուտի պաշտպանության քաղաքացիական նախաձեռնության» անդամ Արթուր Գրիգորյանը:
«Մեր ձեռքին է հայտնվել փաստաթղթերի մի փաթեթ, որը վկայում է պատմամշակութային հուշարձանների ցանկում գտնվող երկու կառույցի քանդման մասին: Դրանք են՝ Երևանի Աբովյան 3 հասցեում գտնվող «ԱՕԿՍ»-ի հուշարձան-շենքի և դրա անմիջապես հարակից՝ կրկին հուշարձան-շենքերի մասին:
Նշված հուշարձանների անմիջական հարևանությամբ՝ հայտնի «շինարար» Սամվել Մայրապետյանի կողմից կառուցվում է 10 վերգետնյա հարկեր ունեցող մի հյուրանոցային համալիր: Համալիրի նախագիծն իրականացվել է «Նարեկ Սարգսյան ճարտարապետական արվեստանոց» ՍՊԸ-ի կողմից, որի անվանումն իսկ հուշում է, թե ով է այս թյուրիմացության «գլխավոր ճարտարապետը»:
Չանդրադառնալով այն հանգամանքին, որ Փոքր Կենտրոնի առանց այդ էլ գերխիտ կառուցապատված տարածքում հսկայական հյուրանոցային համալիրի գործարկումն ուղղակի կաթվածահար է անելու քաղաքի այդ հատվածում երթևեկությունը՝ անդրադառնանք իրավական խախտումներին:
Այսպես՝ ՀՀ քաղաքաշինության նախարարության՝ քաղաքաշինական պետական տեսչության ՀՀ արտակարգ իրավիճակների նախարարության կողմից տրված գրությունների համաձայն, նշված հյուրանոցային համալիրի նախագծումը և շինարարությունն իրականացվում են գործող քաղաքաշինական օրենսդրության կոպիտ խախտմամբ:
Լիովին անտեսվել են թե հակահրդեհային, և թե սեյսմիկ անվտանգության նորմերը:
Նախագծի համաձայն, հյուրանոցը կառուցվում է Աբովյան փողոցից 21 մետր հեռավորության վրա՝ իբր ստեղծելով «կանաչ հեռանկար», որը պետք է լինի հենց ԱՕԿՍ-ի և դրան հարակից հուշարձան-շենքերի տեղում:
Ներկայացված լուսանկարներից, սակայն, պարզ է դառնում, որ հյուրանոցային համալիրի կառուցումից հետո Երևանի պատմամշակութային հուշարձանների փոխարեն լինելու է պարզապես ավտոկայանատեղի և հյուրանոցի սպասարկման համար անհրաժեշտ այլ ենթակառուցվածքներ:
Այս ամենի վերլուծությունից հետո իրավապահ մարմինների համար առաջանում են առնվազն հետևյալ հարցադրումները՝
1. Արդյո՞ք Երևանի գլխավոր ճարտարապետ Նարեկ Սարգսյանի անձնական նախագծային ՍՊԸ-ի կողմից Երևան քաղաքում նախագծային գործունեությամբ զբաղվելը կոռուպցիայի դրսևորում չէ:
2. Ինչպե՞ս է ստացվել, որ Երևանի քաղաքապետ Տարոն Մարգարյանը հաստատել է հսկայական հյուրանոցային համալիրի կառուցման մի նախագիծ, որը չի քննարկվել քաղաքապետարանի քաղաքաշինական խորհրդում:
3. Ինչու՞ մշակույթի նախարարությունը որևէ դիրքորոշում չի արտահայտում հուշարձանները քանդելու կապակցությամբ, այն դեպքում, երբ հյուրանոցային համալիրի նախագծի սխեմայում հուշարձանները բացակայում են:
4. Արդյո՞ քաղաքաշինության և արտակարգ իրավիճակների նախարարությունների,
Ինչպես նաև ճարտարապետների միության կողմից ներկայացված՝ վերը նշված գրությունների առկայության պայմաններում շինարարական աշխատանքների շարունակումը չի վկայում խոշոր կոռուպցիոն գործարքի մասին:
Ի վերջո, նախընտրական այս թոհուբոհի մեջ պետական կառավարման և իրավապահ մարմինների կողմից ցուցաբերվող նմանօրինակ սանձարձակ վարքագիծը շատ «ոչ գեղեցիկ» իրավիճակ է ստեղծում այդ համակարգի՝ գործող «գլխավոր ճարտարապետի» համար»,- «ԷկոԼուր»-ին նամակով հայտնեց Արթուր Գրիգորյանը: Լուսանկարներում ներկայացնում ենք ՀՀ քաղաքաշինության նախարարության քաղաքաշինական պետական տեսչության, ՀՀ արտակարգ իրավիճակների նախարարության, Հայաստանի ճարտարապետների միության նամակները, որոնք փաստում են հյուրանոցի կառուցման արդյունքում քաղաքաշինական նորմերի խախտումները:
