Դիարբեքիրում ձերբակալվել է հայտնի «Ռոյթերս» («Reuters») միջազգային լրատվական գործակալության լրագրողը: Թուրքական «Posta» թերթի փոխանցմամբ՝ հարավ- արևելյան տարածաշրջանում «Ռոյթերսի» թղթակից և օպերատոր Ֆարուք Յուջեն ձերբակալվել է Դիարբեքիրի Սուր շրջանում երեք օր շարունակ չդադարեցվող պարետային ժամի և Անկարայի ահաբեկչությունների դեմ իրականացվող բողոքի երթի լուսաբանման ժամանակ:
Շուրջ 5.000 ցուցարարից բաղկացած խումբը քայլերթից հետո ներկայացրել է իր պահանջներն ու նստացույց կազմակերպել: Ցույցը ցրել ցանկացող ոստիկանների և ցուցարարների միջև բախում է սկսվել: Ցուցարարները քարեր ու շշեր են նետել ոստիկանների կառուցած բարիկադների ուղղությամբ, իսկ ոստիկանները արցունքաբեր գազ են կիրառել: Ֆարուք Յուջեն հեռախոսի միջոցով լուսանկարել ու նկարահանել է բախումը, ինչի համար ոստիկանները նրան ձերբակալել են: Անվտանգության բաժանմունքի աշխատակիցները թեև ընդունել են, որ Ֆարուք Յուջեն ընդամենը իր լրագրողական պարտականությունն է կատարել և խոստացել են , որ նրան ազատ կարձակեն, սակայն լրագրողը ազատ չի արձակվել:
Աղբյուր` Ermenihaber
