Լրագրող Թաթուլ Հակոբյանի ֆեյսբուքյան գրառումը. «Միշտ մտածել եմ, որ Սերժ Սարգսյանը (ի տարբերություն Ռոբերտ Քոչարյանի, ով համարում էր Արցախի հարցը լուծված) մտահոգված էր Արցախի ճակատագրով և փորձում էր ընդունել ԵԱՀԿ Մինսկի խմբի առաջարկները, սակայն վերջին պահին չէր կարողանում մտնել պատասխանատվության պատմական բեռի տակ և Արցախի շուրջը տարածքները վերադարձնել Ադրբեջանին:
Երբ 2015-ի նախօրեին երրորդ նախագահը մտադրություն հայտնեց փոխելու Սահմանադրությունը, այդ քայլի տակ ավելի շատ տեսնում էի նրա ձգտումը՝ ցավալի փոխզիջումներով հասնելու կարգավորման և պատասխանատվությունը բաժանելու, դնելու խորհրդարանի վրա:
Երբեմն անգամ մտածում եմ, թեև ծանրակշիռ հիմքեր չունեմ, որ 2016 թվականի ապրիլյան քառօրյա պատերազմը և «Սասնա ծռերի» ապստամբությունը նույն տարվա հուլիսին որոշ կապ ունեն Սերժ Սարգսյանի՝ տարածքները վերադարձնելու մտադրության հետ, սակայն, կրկին, վերջին պահին երրորդ նախագահը համարձակություն չի ունեցել մտնելու պատասխանատվության բեռի տակ:
Ուշագրավ է նաև Նիկոլ Փաշինյանի ներգրավվածությունը հուլիսյան ապստամբության օրերին: Նա էր, որ մտավ ՊՊԾ տարածք և զրուցեց «Սասնա ծռերի» հետ և տարածեց կադրեր, նա էր, որ այդ օրերին Լևոն Տեր-Պետրոսյանին և Սերժ Սարգսյանին հրապարակավ մեղադրեց Արցախի շուրջը տարածքները զիջելու դավադիր համագործակցության համար:
Տարիներ ու տասնամյակներ անց միայն, երբ կբացվեն հայկական պետական այսօր գաղտնի փաստաթղթերը, մենք կկարողանանք իմանալ Սերժ Սարգսյանի, «Սասնա ծռերի» և Նիկոլ Փաշինյանի հնարավոր կապերի ու անգամ համագործակցության մասին»: