Հալեպում հրթիռակոծության է ենթարկվել հայաբնակ Նոր Գյուղ թաղամասում Քարեն Եփփե ազգային ճեմարանի փողոցը, բարեբախտաբար, մարդկային վնասներ չկան, քանի որ այս շրջանն արդեն հիմնականում դատարկ է:
Իրավիճակը լարված է հատկապես Սուլեյմանիե հայաշատ, քրիստոնեաբնակ թաղամասում։ Այստեղ օրեր առաջ հրթիռների տարափ էր տեղացել, ինչի հետևանքով գրանցվել էին զոհեր ու վիրավորներ։ Ռմբակոծության հետևանքով վնասվել է նաև «Սիմոն Վրացյան» կենտրոնը, որտեղ ժամանակավորապես տեղափոխվել էր Հալեպի ազգային առաջնորդարանը։ Քաղաքում արդեն մի քանի շաբաթ է՝ անջատված է համացանցը, հեռախոսակապը գործում է լուրջ խափանումներով:
Արաբագետ Սարգիս Գրիգորյանը նկատում է՝ Հալեպում ծանր իրավիճակ է ստեղծվել, իսկ ՀՀ-ն սահմանափակ հնարավորություններ ունի, բայց գոնե միջազգային հարթակներում պետք է ստեղծված իրավիճակը լսելի դարձնել ու մտածել սիրիահայերի անվտանգության ապահովման մասին.
«Պարզ է, որ որոշ կառույցների հետևում կանգնած է Թուրքիան, որը փորձում է այս կերպ ապահովել իր ներկայությունը տվյալ տարածքում: Գաղտնիք չէ, որ այս կառույցների ճանապարհն անցնում է Թուրքիայի սահմանով: Ասել է, թե ստանում են Թուրքիայի կառավարության աջակցությունը: Խնդիրը Ասադի վարչակարգի դեմ է ու ռմբակոծությունն իրականացվում է նրանց կողմից վերահսկվող տարածքներում»,-նշեց արաբագետը:
Անի Կարապետյան
