ԱԺ-ում քննարկվում է ՀՀ՝ ԵՏՄ մասին 2014թ. մայիսի 29-ի պայմանագրին միանալու վերաբերյալ փաստաթուղթը:
ՀՅԴ պատգամավոր Արծվիկ Մինասյանի հարցը 1993 թվականին կնքված և 1994 թվականին վավերացված Տնտեսական միություն ստեղծելու մասին միջազգային մի պայմանագրի մասին էր:
-Ըստ իրավական ակտերի տեղեկագրի՝ սա գործում է առ այսօր և Հայաստանը փաստացի համարվում է տնտեսական միության անդամ: Այդ պայմանագրով նախատեսված են պայմաններ, որոնց համաձայն տնտեսական միությունը ենթադրում է դրամավարկային, հարկային, գնային, արտաքին տնտեսական, մաքսային և արժութային քաղաքականություն: Նախատեսված է մաքսային միության ձևավորում: Նախատեսված է, որ որևէ երրորդ երկրի հետ պետք է իրականացնեն ընդհանուր մաքսագնի սահմանում: Ավելին, նախատեսված է, որ ձևավորվելու է արժութային համակարգ՝ ռուսական ռուբլու վրա հիմնված: Այս պայամնագիրը դուք հաշվի առե՞լ եք, այն ի՞նչ ուժ ունի: Սրանով նախատեսված նախապայմանները շատ ավելի խիստ են, ինքնիշխանությունը ոչնչացնող, քան թե այն, ինչ որ բերվել է,-հայտարարեց Արծվիկ Մինասյանը:
Ֆինանսների նախարարի տեղակալ Սուրեն Կարայանը պատասխանեց, որ պայմանագիրը վավերացվել է 1994 թվականին՝ գերագույն Խորհրդի կողմից: Դրանով նախատեսված են ավելի խիստ նորմեր: Այն հիմնականում նպատակադրումների մասին է.այն, թե ինչ քայլերի պետք է գնալ: Սահմանված չէ, թե ինչ պետք է արվի և ինչպես:
Սուրեն Կարայանի խոսքով՝ այդ պայամանգրի ուժը կորցրած չէ:
Նշենք, որ այսօր ՀՅԴ խմբակցության ղեկավար Արմեն Ռուստամյանը լրագրողների հետ զրույցում ասել է, որ այդ պայմանագիրը կնքվել է Հայաստանի, Ռուսաստանի, Բելառուսի միջև:
