«Այս պայմանագիրը փաթաթվել է մեր վզին: Այո՛, բանակցել եք, թղթի վրա գրված ինչ-որ բաներ եք բերել ու բոլորիս համոզում եք, որ այստեղ այս տեսակի հնարավորություններ կան: Ի՞նչ հնարավորություն է այն մեզ տալիս: Ի դեպ, քանի՞ փաստաթուղթ ենք մենք կարողացել կյանքի կոչել: Ունենք ՀԱՊԿ համաձայնագիրը, իսկ, թե ինչքանով ենք այն օգտագործում՝ չգիտեմ, Համաշխարհային առևտրի կազմակերպության հետ համաձայնագիրը, այնտեղ քանի՞ անգամ ենք հարց բարձրացրել, որ բիզնես շահերը պաշտպանենք»,-խոսելով ՀՀ-ի՝ ԵՏՄ-ին միանալու պայմանագիրը վավերացնելու մասին հարցից՝ ասաց «Ժառանգություն» խմբակցության պատգամավոր Թևան Պողոսյանը:
«Անջատելու են հասարակության ձայնը, հայտարարելու են, որ Iphone ու ֆեյսբուք չպետք է լինեն: Չկա վստահություն ցանկացած սննդի ապրանքի վրա: Այս տեսակի Հայաստանի մասի՞ն ենք երազում, թե՝ այն, որտեղ մարդու իրավունքները կհարգվեն, քաղաքացիական հասարակության ձայնը լսելի կլինի: Ինչքան էլ որ ասենք՝ սա տնտեսական է, այն, ի վերջո, քաղաքականությունն է փոխելու և, բնականաբար, Հայաստանը դառնալու է այնպիսին, ինչպիսին կլինի այդ տնտեսության արժեքային համակարգը: Ցավոք, ԵՏՄ անդամների մեջ գործող արժեքային համակարգն այն չէ, ինչ մեզ պետք է: Հայաստա՞նն է փոխելու արժեքային համակարգը, կասկածում եմ: Կախվածությունն ամենավատ երևույթն է»,-ասաց պատգամավորը:
