Ընթացիկ տարին գյուղատնտեսության համար կարծես թե այնքան էլ բարենպաստ չէ: Ամեն դեպքում նման կանխատեսումներ են անում գյուղաբնակները:
«Այս տարվա մայիսը ժողովրդական խոսքով ասած վայիս էր նաև գյուղատնտեսության համար:Ամիսը սկսվեց և շարունակվում է անձրևներով ու կարկտահարությամբ», իրենց հոգսերի մասին արդեն իսկ բարձրաձայնում են գյուղաբնակները: Առավել շատ տուժեցին Արմավիրի և մասամբ էլ Արարատի մարզերի գյուղացիները : Կարկտահարությունից պակաս տուժած Արարատի մարզում սակայն անընդհատ տեղացող անձրևները փչացնում են եղած բերքն ու բարիքը: Խոնավությունից ու անձրևի հարվածներից դեռ չհասունացած ծիրանի վրա առաջացել են սև խալեր`գյուղացիների լեզվով ասած «յարաներ» , որոնք էլ որակազրկում ու փչացնում են պտուղը:
Գյուղացիները ASEKOSE.am-ի թղթակցի հետ զրույցում նշեցին հետեւյալը.« Վերջին մի քանի տարիներին ծիրանի հասնելուն պես հարևան Վրաստանի և տեղացի գործարարները ծիրան են արտահանում հիմնականում Ռուսաստանի Դաշնություն:Բնականաբար արտահանվում է ընտրված առողջ և գեղեցիկ միրգ,սակայն եղած ծիրանը արդեն որակազրկված է և մեր միակ սպառման այլընտրանքը մնում է ապրանքը հանձնել մթերող ձեռնարկություններին»: Գյուղաբնակների խոսքերով մթերքը հիմնականում հանձնում են Արթ Ֆուդ պահածոների գործարանին, որն ինչպես հայտնի է,պատկանում է գյուղնախարար Սերգո Կարապետյանին:
«Բացի այն, որ գործարանը ճարահատ գյուղացիներից կմթերի ծիրանը նվազագույնի հասնող գներով,մի քանի ամիս էլ մենք ստիպված ենք հավաքվել գործարանի պատերի տակ եւ սպասել գումարներին: Ինչպես ընդունված է մեր երկրի ախպեր- ծանոթ օրենքներով, ով կունենա բարեկամ , քավոր, սանիկ , համեմատաբար շուտ կստանա իր գումարը,իսկ ով էլ չէ, դեռ շատ կսպասի ինչպես ամեն անգամ», դժգոհում էին գյուղացիները, ավելացնելով հետեւյալը.
« Հարցին թե ինչու մեր փողը չեք տալիս այ ախպեր,հիմնականում ստանում ենք հետեւյալ պատասխան.
-Էկել եք ստեղ , որ ի՞ նչ անեք՝ գնացեք երբ եղավ կտանք էլի….»:
Գյուղացիները նշում են նաև, որ արդեն անորակ դարձած ծիրանը, հիմա էլ խոնավության պատճառով դեղնում ու թափվում է:
Իրինա Թադևոսյան
