ԱԺ Ժառանգություն խմբակցության ղակավար Ռուբիկ Հակոբյանն ու ԱԺ նախագահ Գալուստ Սահակյանն այսօր ԱԺ-ում վեճի բռնվեցին: Ռուբիկ Հակոբյանը Աժ արտահերթ նիստում ասաց, որ տեղի են ունեցել դեպքեր, որոնք հասարակության ուշադրության կենտրոնում են, և հենց օրենսդիր մարմնի ղեկավարությունը պետք է խոսեր այդ դեպքերի մասին, այնինչ Գալուստ Սահակյանը լռեցնում է պատգամավորներին:
Գալուստ Սահակյանը, լսելով նրան՝ ձեռքը տնկելով՝ ասաց. «Ի՞նձ եք խորհուրդ տալիս, լսե՛ք, ձեր խորհուրդները ձե՛զ պահեք»: Նա ԱԺ կանոնակարգի մասին հիշեցրեց, իսկ Ռուբեն Հակոբյանը բարկացավ. «Ես տեղյակ եմ կանոնակարգին միգուցե ավելի լավ, քան դուք, մի սրեք իրավիճակը, դուք բոլորից շատ եք սրում իրավիճակը»: Գալուստ Սահակյանն էլ հեգնանքով պատասխանեց ՝«Եթե դու մտածում ես դու էնքան ես, որ քեզանով պտի սրվի՞ իրավիճակը, շարունակի»,- Ռուբիկ Հակոբյանի վրա բարկացավ Գալուստ Սահակյանը։
Ռուբեն Հակոբյանը սկսեց վիճել՝ բարձր տոնով. «Վե՛րջ տվեք ձեր այդ պրակտիկային: Ես գիտեմ որտեղ եմ գտնվում, ովքեր չգիտեն սա ինչ է, կխնդրեմ կարդալ կանոնակարգը, պառլամենտական մշակույթին տեղյակ լինեն, որպեսզի իզուր տեղը չլարեն իրավիճակը: Գլխավոր լարողն այսօր դո՛ւք եք: Չե՛ք տիրապետում ո՛չ կանոնակարգին, ոչ էլ պառլամենտական մշակույթին»:
Գալուստ Սահակյանն արձագանքեց. «Ձեզ կզրկեմ խոսքից, որովհետեւ լեզվին եք տալիս, ոչ թե մտքին»: Ռուբեն Հակոբյանն էլ՝ թե «Ես շատ բան ունեմ տալու, բայց թույլ տվեք խոսեմ: Այս մարմինն ու այս ամբիոնը թանկ է ինձ համար»:
