ՀՀԿ փոխնախագահ Արմեն Աշոտյանի փաստաբան Տիգրան Աթանեսյանն այսօրվա ասուլիսի ժամանակ ասել է, որ Հակակոռուպցիոն դատարանում ընկեր ունի, որի հետ չի շփվում. «Նա նաև երեխայիս քավորն է, բայց մեր կապը խզվել է: Ունեմ ընկեր, որ ՍԴ դատավոր է, բայց հավերժ ջնջել եմ իմ կյանքից: Ունեմ ընկեր, որ Գլխավոր դատախազի տեղակալ էր, նրան բարև չեմ տալիս, որովհետև Նիկոլից պաշտոն է ստացել: Սա է պայքարը, ես զրկվել եմ բազմաթիվ ընկերներից»,- ասել է նա:

Ավելի վաղ Աթանեսյանը մանրամասներ էր հայտնել Արմեն Աշոտյանի գործից:

Նա ասել էր, որ կալանավորված Արմեն Աշոտյանին զրկել են ընտանիքի անդամների՝ երեխաների հետ շփվելու հնարավորությունից: Խոսելով բուն գործի մասին՝ փաստաբանը նշեց, որ Աշոտյանին կալանավորել են շիտակ խոսքի, քննադատության համար. «Արմեն Աշոտյանի՝ քաղաքական բանտարկյալ լինելու մասին են հայտնում Եվրոպայի իշխող կուսակցությունը, եվրոպական կառույցները, սոցհարցումները»,- ասաց նա՝ հավելելով, որ «սա լրջագույն ապտակ է իշխանությանը». «Ժողովրդավարությունից են խոսում, ի՞նչ ժողովրդավարություն, ինչի՞ մասին է խոսքը, սա խայտառակություն է»,- հավելեց Աթանեսյանը: