Ռուսաստանն ու ԵԱՏՄ-ում նրա գործընկերներն անընդունելի են համարում իրենց հաշվին Եվրոպական միությանը մերձենալու Հայաստանի սպառողական մոտեցումը։ «ՌԻԱ Նովոստի»-ին տված հարցազրույցում այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
«Եվս մեկ անգամ ընդգծեմ, որ մեր համար անընդունելի է մեր հաշվին դեպի ԵՄ գնալու վերաբերյալ զուտ սպառողական մոտեցումը։ Ինչպես բխում է առաջնորդների հայտարարությունից, եվրասիական ինտեգրման գծով մեր գործընկերները նույն կարծիքին են»,— ասել է Զախարովան։
Հայաստանի խորհրդարանը մարտին օրենք էր ընդունել Եվրամիությանն անդամակցելու գործընթաց սկսելու մասին, որն ապրիլին վավերացրել էր հանրապետության նախագահ Վահագն Խաչատուրյանը։ Իր հերթին, Ռուսաստանի նախագահ Վլադիմիր Պուտինը Հայաստանի վարչապետ Նիկոլ Փաշինյանի հետ հանդիպմանը հայտարարել էր, որ միաժամանակ թե՛ ԵՄ-ի և թե՛ ԵԱՏՄ-ի հետ մաքսային միության մեջ գտնվելն անհնար է։
ԵԱՏՄ-ից դուրս գալու դեպքում Հայաստանը կարող է կորցնել այն առևտրային արտոնությունները, որոնք ստանում էր Միությանն անդամակցության շնորհիվ, մասնավորապես՝ Միության երկրների համար գործող 5%-ի միասնական ցածր սակագնային դրույքաչափը և անգամ մի շարք դեպքերում ապրանքների անմաքս ներկրման իրավունքը։
***
|
Հայաստանը ՀԱՊԿ անդամավճարներ չվճարելու պատճառով կարող է զրկվել աշխատանքային մարմիններում ձայնի իրավունքից մինչև պարտքի ամբողջական մարումը: Այս մասին «ՌԻԱ Նովոստի»-ին տված հարցազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։ «Կազմակերպության կանոնադրության 25-րդ հոդվածի համաձայն՝ պետության կողմից իր պարտավորությունները չկատարելու դեպքում նրա նկատմամբ կարող են միջոցներ կիրառվել, մասնավորապես՝ բյուջեի հանդեպ երկու տարվա ընթացքում պարտք ունենալու դեպքում՝ այդ պետության քաղաքացիներին քվոտային պաշտոններում առաջադրելու իրավունքի կասեցում, ինչպես նաև աշխատանքային մարմիններում ձայնի իրավունքից զրկում՝ մինչև պարտքի ամբողջական մարումը», - ասել է Զախարովան։ *** Ռուսաստանի ԱԳՆ պաշտոնական ներկայացուցիչ Մարիա Զախարովան անդրադարձել է Հայաստանում կայացած խորհրդարանական ընտրությունների արդյունքներին՝ հայտարարելով, որ դրանք, իր գնահատմամբ, ցույց են տվել՝ հայկական հասարակությունում չկա միանշանակ աջակցություն Արևմուտքի հետ առավել սերտ ինտեգրման քաղաքականությանը։ Զախարովայի խոսքով՝ քվեարկության արդյունքները նաև ցույց են տվել, որ Հայաստանում պահպանվում է Ռուսաստանի հետ հարաբերությունների ամրապնդման հանրային պահանջ։ Հայաստանում խորհրդարանական ընտրությունները անցկացվել են հունիսի 7-ին։ Ըստ հրապարակված արդյունքների՝ խորհրդարան են անցել Քաղաքացիական պայմանագիր կուսակցությունը՝ վարչապետ Նիկոլ Փաշինյանի գլխավորությամբ, ինչպես նաև ընդդիմադիր ուժերը՝ Հայաստան դաշինքը և «Ուժեղ Հայաստան» քաղաքական ուժը։ |
