Լրագրող Թաթուլ Հակոբյանի ֆեյսբուքյան գրառումը. «Այսօր Հայաստանը շարունակում է կանգնած մնալ լրջագույն մարտահրավերների առաջ, և ինձ ապշեցնում է, թե ինչու ենք օրակարգի թիվ մեկ խնդիր դարձնում Հայ եկեղեցու թեման:
Բազմիցս գրել եմ, որ վարչապետ Փաշինյանը ընդդիմության նկատմամբ ունի ակնհայտ առավելություն, որովհետև կարողանում է օրակարգ ձևավորել, օրակարգ թելադրել և իր հետևից քարշ տալ մեր ընդդիմությանը:
Քանի դեռ ընդդիմությունը քարշ եկողի դերում է և ոչ օրակարգ թելադրողի, ինքը միշտ պարտվելու է:
Մյուս կողմից, պետք է նկատենք, որ Հայաստանի եկեղեցիներում իրականացվող պատարագները Մայր Աթոռի և Ամենայն Հայոց կաթողիկոսի դեմ դուրս եկած մեր սրբազանների և վարչապետ Փաշինյանի մասնակցությամբ նախ և առաջ քաղաքական ու ներքաղաքական միջոցառումներ են:
Տրամաբանությունը հուշում է, որ հաջորդ պատարագը կազմակերպվելու է Էջմիածնում, չեմ բացառում՝ Մայր Աթոռում:
Եկեղեցին նորոգելու ՀՀ իշխանությունների հավաստիացումները կարող էին հավատ ներշնչել, եթե վարչապետ Փաշինյանը կուսակրոնության ուխտը խախտածների դեմ, ինչպես ինքն ու նրա ՔՊ-ական թիմն է ագրեսիվորեն տարածում, պայքարեին մեր եկեղեցու այնպիսի սրբազաններ, որոնք սիրված լինեին ժողովրդի կողմից:
Վարչապետ Փաշինյանը կանգնել է Նավասարդ Կճոյան սրբազանի ու մի քանի այլ եպիսկոպոսների վրա, որոնք հայտնի են սկանդալային, աշխարհիկ ու հոգևորականներին ոչ վայել կյանքով:
Բավական է գուգլում գրել "Փաշինյան և Կճոյան" ազգանունները կողք կողքի, և դուք կհամոզվեք, թե նախկինում, այդ թվում ընդամենը շաբաթներ առաջ, ինչպիսի բառապաշար է օգտագործել ՀՀ վարչապետը Արարատյան թեմի առաջնորդական փոխանորդի հասցեին:
Երբ Կճոյան սրբազանով է վարչապետ Փաշինյանը մաքրում Հայոց եկեղեցին, ապա դրանով ավելի մեծ վարկաբեկում Հայոց եկեղեցու նկատմամբ դժվար է գտնել»:

«Նիկոլ Փաշինյանին ներե՞լ եք ձեզ «Բենթլի Կճոյան» անվանելու համար: Նա մեղադրանքներ է հնչեցրել ձեր հասցեին՝ ասելով, որ դուք կին ու երեխաներ ունեք, սիրուհիներ ունեք տարբեր երկրներում, դուք ներե՞լ եք նրան», - Սուրբ Սարգիս եկեղեցու բակում հարց ուղղվեց Նավասարդ արքեպիսկոպոս Կճոյանին, ով Նիկոլ Փաշինյանի ներկայությամբ պատարագի ժամանակ չհնչեցրեց Կաթողիկոս Գարեկին Բ-ի անունը:

Նավասարդ արքեպիսկոպոսը արձագանքեց՝ «այ քեզ բաներ»՝ անպատասխան թողնելով հնչեցված հարցը:

Սուրբ Սարգիս եկեղեցում մատուցված Սուրբ Պատարագի ժամանակ Վեհափառի անունը նորից չհնչեց, ինչից հետո քաղաքացիները բարձրաձայն հնչեցրել են Ամենայն Հայոց Կաթողիկոս Գարեգին Բ-ի անունը: Դրանից հետո երկու քաղաքացու՝ ռեժիսոր Հովհաննես Իշխանյանին և ակտիվիստ Հայկ Դորունցին քաշքշելով դուրս բերեցին եկեղեցուց:

«Մենք տեսանք, որ հայ ժողովուրդը չպաշտպանեց վարչապետի ակցիաները՝ եկեղեցու դեմ, և հայ ժողովուրդը կանգնեց Կաթողիկոսի կողքին: Եկեղեցու պրոցեսները դրսից քանի որ չկարողացան իրենց ուզած հանգուցալուծմանը բերել, դրանք գնացին ներքին հանգուցալուծման»,- Սուրբ Սարգիս եկեղեցու բակում լրագրողների հետ զրույցում ասաց «Մեր ձևով» շարծման համակարգող Նարեկ Կարապետյանը՝ անդրադառնալով պատարագի ժամանակ Նավասարդ արքեպիսկոպոսի կողմից Կաթողիկոսի անունը չհնչեցնելուն: