Ռուսաստանը չի կարող թույլ տալ «Իսլամական պետություն» ահաբեկչական խմբավորման կողմից իր կամ դաշնակիցների տարածքներում սպառնալիքի տարածումն ու հետագայում էլ շարունակելու է օգնել Սիրիայի օրինական իշխանություններին:
ТАСС-ի փոխանցմամբ` այդ մասին հայտնել է ՌԴ պաշտպանության նախարար Սերգեյ Շոյգուն:
«Վերջին շրջանում զգալիորեն աճել է կրոնական ծայրահեղականության դրսևորումը՝ այսպես կոչված «Իսլամական պետության» հովանու ներքո։ Մենք չենք կարող թույլ տալ ահաբեկչության սպառնալիքի տարածումը Ռուսաստանի ու մեր դաշնակիցների տարածքներում»,-ասել է Շոյգուն։
Նախարարը նշել է, որ հենց այդ պատճառով էլ Ռուսաստանը վճռել է արձագանքել բարեկամական Սիրիայի խնդրանքին և երկրի օրինական իշխանություններին ռազմական օգնություն ցուցաբերել։
«Սիրիական կառավարական զորքերը, մեր օդային աջակցությամբ, պաշտպանությունից անցել են հարձակման և ազատագրել են իրենց տարածքների մի մասը, որը վերահսկում էր ԻՊ-ը»,- հիշեցրել է Շոյգուն:
Հիշեցնենք, որ Ռուսաստանը սեպտեմբերի 30-ից օդային հարվածներ է հասցնում Սիրիայում ահաբեկիչների օբյեկտներին։
