«Ռուսական օդուժի հաջողված հարվածների շնորհիվ սիրիական ռազմադաշտում հօգուտ բանակային ստորաբաժանումների ակնհայտ փոփոխություններ արձանագրվեցին»,-այսօր՝ լրագրողների հետ հանդիպման ժամանակ խոսելով Ռուսաստանի կողմից սիրիական հակամարտությանը միջամտելու մասին՝ ասաց արաբագետ Արմեն Պետրոսյանը՝ շարունակելով.
«Ռուսաստանի ներգրավվածությունը խառնեց այն բոլոր խաղաքարտերը, որոնք ունեին տարածաշրջանային և արևմտյան մի շարք պետություններ: Առաջինը Թուրքիան էր, որը Սիրիայում մի շարք ծրագրեր ուներ, անգամ փորձում էր ամեն կերպ ընդդիմանալ Սիրիայում քրդական ինքնավար միավորի ստեղծմանը»:
Իսկ, թե ինչո՞ւ հենց հիմա Ռուսաստանը միջամտեց սիրիական հակամարտությանը,-արաբագետը նկատում է.
«Այն պայմանավորված է 2 կարևորագույն գործոններով.բանն այն է, որ վերջին մի քանի ամիսների ընթացքում Ռուսաստանի դաշնակից Բաշար Ասադի վարչակարգը զգալիորեն զիջել էր դիրքերը հակակառավարական խմբավորումների և ԻՊ-ին: Նրա հիմնական ուժերը դուրս էին բերվել երկրորդական շրջաններից և ամրացրել էին դիրքերը Դամասկոսում և Լաթաքիայում: Երկրորդ պատճառն այն է, որ ուկրաինական ճգնաժամը հանգուցալուծման շրջանում է, և Ռուսաստանի դիրքերն այդքան էլ ուժեղ չեն: Նրանք իրենց ծրագրերի կեսը չիրականացրեցին: Մեծ դեր ունի նաև Եվրոպային պատուհասած միգրացիոն ճգնաժամը»:
Անի Կարապետյան
