ԱԺ ՀՀԿ խմբակցության պատգամավոր Խոսրով Հարությունյանի կարծիքով Սահմանադրական բարեփոխումների հանձնաժողովը արդարև փորձեց օգտագործել Սահմանադրությունը բարեփոխելու հնարավորությունը և անդրադարձավ ոչ միայն կառավարման համակարգի փոփոխության խնդրին:
«Կար հանրային պահանջ և այդ պահանջն արտահայտնողները հիմանականում ընդդիմադիր քաղաքական ուժերն էին »,-ասաց պատգամավորը:
Հարցին՝ ինչո՞ւ են հիմա իշխանությունները գնում սահմանադրական փոփոխություններին, Խոսրով Հարությունյանը պատասխանեց, որ դա կոռեկտ հարցադրում չէ.
«Իշխանությունն ընդամենը արձագանքում է ընդդիմության պահանջին: Իշխանությունները համոզված էին, որ այս քայլով ընդդիմության հետ կառուցողական համագործակցության դաշտ են ստեղծում: Նպատակը սա էր, ցավոք, իշխանության ներկայացուցիչները հիասթափվեցին, որովհետև այսօր ընդդիմությունը մերժում է այն թեզերը, որոնք իրենք էին ներկայացնում»,-նկատեց Խոսրով Հարությունյանը:
Հարցին, թե եթե հիմա հանրության շրջանում հարցում անցկացվեր, թե կա՞ արդյոք Սահմանադրական փոփոխությունների անհրաժեշտություն, ո՞ր մասն այո կպատասխաներ, ՀՀԿ-ական պատգամավորը նկատեց.
«Սահմանադրական բարեփոխումների հասարակական պահանջը երբեք ներքևում չի ձևավորվում: Սրա քաղաքական կարևորությունը ձևավորվում է վերևներում: Շարքային քաղաքացին, նույն գյուղացին իրավական, քաղաքական, վերլուծական կարողություններ չունի, որ կարողանա գիտակցել, թե իր խնդիրների հիմնական աղբյուրը որտեղից է գալիս»:
Անի Կարապետյան
