«Իրականացվող միջոցառումների հիմքում երկու թիրախային խումբ կա.Հայաստանի ներսում և դրսում: Ավելի հաջողված եմ համարում այն, ինչն ուղղված է դեպի դուրս: Վերջին շաբաթվա ընթացքում դա տեսանք. Հայոց Եղեռնի զոհերի հիշատակին Հռոմի պապի մատուցած պատարագը Սուրբ Պետրոսի տաճարում, որն ունի ոչ միայն եկեղեցական, բարոյական, այլև քաղաքական նշանակություն: Հետագայում դրա արձագանքներն ավելի ուժգին կլինեն»,-այսօր՝ լրագրողների հետ հանդիպման ժամանակ ասաց քաղաքական վերլուծաբան Վիգեն Հակոբյանը:
Ինչ վերաբերում է Հայոց ցեղասպանության հարցի բարձրացմանը, վերլուծաբանի խոսքով, իհարկե մեծ դեր ունեցավ Քիմ Քարդաշյանի և ամուսնու այցը:
«Դա PR ակցիա էր: Պետք է հաշվի առնենք, որ այս մարդիկ ունեն մեծ լսարան, Քիմը ամենաճանաչելի հայկական բրենդն է ու եթե նա ցանկություն չունենար գալ Հայաստան, որը նաև ԱՄՆ նախագահի ցանկությունն է, մեր իշխանությունները ոչինչ չէին կարող անել:
Շնորհիվ նրանց այցի՝ «Որտե՞ղ է Հայաստանը» հարցը Google-ում 6.5 անգամ ավելացել է, քանի որ կան մարդիկ, ովքեր չգիտեն, թե Հայաստանը Աֆրիկայում է, Անտարկտիդայում թե՝ այլ տեղ: 60 տոկոսով ավելացել է նաև Հայաստան բառի փնտրտուքը»,-նշեց Վիգեն Հակոբյանը:
Քաղտեխնոլոգ Կարեն Քոչարյանի խոսքով՝ մեգաաստղերին հետևողները երիտասարդներ են, որոնք վաղվա ղեկավարներն են լինելու և այսօր արդեն իմացան Հայոց Ցեղասպանության, Հայաստանի մասին:
Անի Կարապետյան
