ԱԱԾ նախկին պետի տեղակալ Գուրգեն Եղիազարյանն այսօր՝ լրագրողների հետ հանդիպման ժամանակ խոսելով հաջորդ տարվա բյուջեի մասին՝ սկսեց նախորդ վարչապետի կառավարումից.
«Նա ոչնչացրեց արժեթղթերի շուկան: Ամեն ինչ արվեց, որպեսզի մոնոպոլիստը կեղեքի հայ ժողովրդին: Եթե նայենք նրա կողմից 6 տարով վերցրած վարկերը, մեր արտաքին պարտքը, որը շուտով 6 միլիարդի կհասնի, կտեսնենք, թե այդ անձը ինչով էր զբաղված: Նրա ջանքերով էր, որ աուդիտը բերվեց զրոյական վիճակի: Այսինքն, ինչ ունեինք՝ կործանեց ու չվեց: Նրան հաջորդեց Հովիկ Աբրահամյանը, ում դիմավորեցին Կառավարության շենքի մոտ գտնվող 100-ավոր բողոքող մարդիկ: Այսօր նրանք արդեն չեն բողոքում, ժամանակին պատասխան ստացան»,-ասաց Գուրգեն Եղիազարյանը՝ շարունակելով.
«Բոլոր այն քաղաքացիները, ովքեր արժեթղթեր են ունեցել (ի դեպ, մեկն էլ ես եմ), տեսել են, թե սրիկայաբար ինչպես են գողացել իմ ունեցվածքը: Դիմելու եմ դատարան և կոչ եմ անում՝ թող նման խնդիր ունեցող քաղաքացիները դիմեն ինձ ու մենք կպատռենք այդ «գրանդ քենդի»-ների դիմակը: Հիմա աչքներս լույս, ավելի բարձր պաշտոն է ստացել: Երևի հատուկ են տարել, որ ԵՏՄ-ն վերացնեն»,-նկատեց ԱԱԾ նախկին պետի տեղակալը:
«Մաղթում եմ, որ նա քայքայի ԵՏՄ-ն»,-Գ.Եղիազարյանի խոսքն ընդհատեց Գերագույն խորհրդի նախկին պատգամավոր Ազատ Արշակյանը:
Վերջինի խոսքով՝ պետք է լիներ խրախուսական բյուջե:
«Պետք է ոստիկանության և ԱԱԾ-ի բյուջեն կրկնապատկվեր, քանի որ մարտահրավերներ ունենք: Պետք է մտածել նաև բանակի մասին»,-ասաց նա:
Անի Կարապետյան
