Այսօր ԱԺ հերթական նիստում մինչ 20 րոպեանոց ընդմիջման գնալը «Ժառանգություն» խմբակցության պատգամավոր Զարուհի Փոստանջյանը հիշեցրեց, որ շրջանառության մեջ էր դրել հայտարարության նախագիծ՝ Սյունիքի այն ժամանակվա մարզպետ Սուրիկ Խաչատրյանի և նրա հանցագործությունների վերաբերյալ, որ մեղադրվում էր ծանր հանցագործությունների մեջ և չպետք է պաշտոնավարի:

Ըստ Փոստանջյանի՝ շրջանցելով կանոնակարգը, Աժ նախագահ Գալուստ Սահակյանը իր նախագիծը  չի դրել շրջանառության մեջ:
«Դուք, այդպես էլ շրջանցելով ԱԺ Կանոնակարգ օրենքը, նախագիծը չդրեցիք շրջանառության մեջ ու դրա համար տեսնում ենք, ինչպես է նրա որդին պարբերաբար ընդգրկվում վիճաբանությունների մեջ, որի արդյունքում վերջերս մի երիտասարդ կուրացել է: Այդ մեղքի բաժինը նաեւ դուք եք կրում, պարոն Սահակյան, այս անպատժելի մթնոլորտի պատճառով, քանի որ Սուրիկ Խաչատրյանի պաշտոնավարումը հասարակության համար սպառնալիք է դառում: Նրա որդին թմրամոլ է, այս արատավոր ընտանիքը ունենալով լծակներ, սպառնալիք է հասարակությանը»:
«Մեզնից որևէ մեկը մեղքի բաժին չունի: Ձեր այսօրվա խոսքը վերաբերում է ոչ թե ԱԺ-ին, Դուք հանցագործությունների մասին եք խոսում, դա ԱԺ քննարկման հարց չէ: Դատախազը հաշվետվությամբ է հանդես գալու, կարող եք հարցադրել: Ե՛վ ընդդիմադիր, և՛ իշխանական պատգամավորները դատապարտում են երևույթները, եթե հանցակազմ կա, պետք է պատժվի»,- հակադարձեց ԱԺ նախագահը:

Խոսակցությանը միջամտեց Սյունիքի մարզից ՀՀԿ-ի քվոտայով մեծամասնականով ընտրված երիտասարդ պատգամավոր, Սուրիկ Խաչատրյանի հովանավորյալ Հայկ Գրիգորյանը. «Իմ գործընկերը իրեն դրել է ամենայն հայոց դատավորի տեղ և անտեղի արտահայտություններ է անում մարզպետի հասցեին: Ձեր մտքի վառ արտահայտությունները այստեղ չանեք»,-ասաց Հայկ Գրիգորյանը և սկսվեց թեժ լեզվակռիվ մի քանի զայրացած պատգամավորների միջև, մասնավորապես` Հայկ Գրիգորյանը, Սեյրան Սարոյանն ու Կարեն Ավագյանը գոռգոռում էին` Զարուհի Փոստանջյանի հասցեին հղելով բազմաթիվ անվայել արտահայտություններ:  

Հայտարարված 20-րոպեանոց ընդմիջման ժամանակ ԱԺ նիստերի դահլիճում Սուրիկ Խաչատրյանի պաշտպանի դերում հանդես եկող գեներալ Սեյրան Սարոյանը լեզվակռիվը շարունակեց Փոստանջյանի հետ: «Աղջի՛կ ջան, ի՞նչ ես ուզում, քաղաքական գործիչ ես՝ ճիշտ ես անում, Սուրիկին կարաս քննադատես, բայց ընտանիքի հետ ի՞նչ գործ ունես: Մարդուն վարկաբեկելու համար խելքդ քոնը չի»,- ասաց գեներալը: Ապա հավելեց. «Դու նրա կնոջը չես ճանաչում, սուտ ես խոսում, ամոթ ա: Բազմազավակ մայր ես, ուրիշի ջահել երեխուն մի՛ վարկաբեկի»,- հորդորեց գեներալը՝ վրդովվելով Փոստանջյանի այն խոսքերից, որ Սյունիքի մարզպետի որդին մեղավոր է նաև Բուդաղյանների հետ կապված արյունալի միջադեպի համար:

«Դիտավորյալ Սուրեն Խաչատրյանը սպանել է Բուդաղյանին»,- ասաց Փոստանջյանը: Ի հակադարձում՝ գեներալ պատգամավորն էլ նշեց. «Ինչի՞, Սուրիկը գնա՞ց Բուդաղյանի տան վրեն»:

Վերջիվերջո Սեյրան Սարոյանի «հաթաթաներին» ի պատասխան Զ.Փոստանջյանը սպառնաց ոստիկանություն կանչել:

Տեսանյութն՝ 1in.am-ի