Տարածաշրջանում Թուրքիայի վարվող ագրեսիվ քաղաքականության հետ է պայմանավորված կրտսեր եղբոր՝ Ադրբեջանի կողմից վերջին շրջանում սահմանում լարվածություն ստեղծելը: Այս մասին լրագրողների հետ հանդիպման ժամանակ ասաց ադրբեջանագետ Գրիգորի Այվազյանը՝ հավելելով.
«Չպետք է մոռանալ, որ վերջերս թուրքական կողմի ուղղաթիռները նպատակադրված հատել են Հայաստանի սահմանը՝ ցույց տալով, որ Հայաստանը լինելով ՀԱՊԿ անդամ՝ չի կարող երաշխավորված լինել թուրքական լկտի ներխուժումից:
Ադրբեջանն էլ, որը սկզբում հրաձգային զենքից էր խախտում հայ-ադրբեջանական սահմանը, անցավ հրթիռահրետանային կայանների կիրառմանը, ու տեսնելով, որ միջազգային հանրությունը չի արձագանքում, հիմա ավելի լկտիաբար է իրեն պահում ու կշարունակի այնքան, մինչև համարժեք հարված չստանա»:
Ադրբեջանագետի խոսքով՝ առաջիկայում լարվածությունը և բռնությունը կշարունակվի.
«Ադրբեջանում խորհրդարանական ընտրություններ են, կհաղթի Ալիևի կուսակցությունը և որպեսզի շեղի ժողովրդի ուշադրությունը, երկրում տիրող քաղաքական , տնտեսական, զինված ուժերում ահավոր վիճակից՝ կսրի իրավիճակն Արցախում»:
Գրիգորի Այվազյանը նկատում է.
«Ադրբեջանին պետք է ցավալի հարված տալ, բայց ոչ այն մակարդակով, որ այն պատերազմի վերաճի: Ինչքան անպատիժ են մնում, մտածում են, որ ավելիին կարող են դիմել:Մենք պետք է նախաձեռնող լինենք, չսպասենք, որ ադրբեջանական կողմը հակահայկական դրսևորում անի, սկսենք բողոքել»:
Անի Կարապետյան
