ՀՀ ԱԺ-ում այսօր վիճաբանություն տեղի ունեցավ ՕԵԿ պատգամավորների և ՀՀ ԱԺ պատգամավոր Ալեքսանդր Արզումանյանի միջև:
«Ինչ Հովիկ Աբրահամյանը վարչապետ է նշանակվել, ես որևէ հարց չեմ կարողացել տալ: Նամակները որ գրվում են, հետո ընթերցվում են, նամակագիրը իր հիացմունքն է հայտնում ու մենք հարցեր չենք կարողանում տալ: Աստված տվել, չի խնայել հեռուստաընկերություններ ունեք, «Խրճիթ ընթերցասրահ» մի հաղորդաշար բացեք, նամակները կարդացեք, իրար պատմեք, չափածո գրեք, բայց մենք հարց տանք»,-ասաց Ալեքսանդր Արզումանյանը:
Հեղինե Բիշարյանը կոչ արեց աշխատող պատգամավորների հասցեին պիտակավորված արտահայտություններ չհնչեցնել:
«Եթե նման ոճով պետք է խոսեն պատգամավոր գործընկերները մեկը մյուսի հասցեին, ապա դրան տեղ կա՝ դահլիճից դուրս: Այ այդ ժամանակ թող գան ու չափվեն, թե ով ում ինչ կարող է ասել»,-ասաց նա:«Ընդհատենք հերոսացման գործընթացները,-նկատեց Գալուստ Սահակյանը, ապա խոսք տալով Լևոն Զուրաբյանին՝ հավելեց.«Հերոսացումը շարունակվում է»:«Ձեզանից հետո էլ ի՞նչ հերոս»,-նետեց Լևոն Զուրաբյանը:
ՕԵԿ պատգամավոր Մհեր Շահգելդյանը՝ հիմնավորելով իրենց ակտիվությունը, հայտարարեց. «Բավական է սովորեցնել, թե ով ինչպես պետք է ձևակերպի իր քաղաքական մոտեցումները: հերիք է գնահատականններ տալ»:
«Խելոք մնա, թե չէ ականջներդ կկտրեմ, Մհեր»,-դիմելով Մհեր Շահգելդյանին՝ ասաց Ալեքսանդր Արզումանյանը: Սրանից հետ սկսեցին վիճել, փորձելով մեղմել իրավիճակը` ԱԺ նախագահն ասաց. «Սովորաբար ընդդիմությունն իշխանության հետ է վիճում, հիմա՝ ընդդիմություն-ընդդիմություն է: Իրար հետ գործ չունեք, մեզ հետ կռվեք»:
Հեղինակ` Անի Կարապետյան
