Ակտիվիստ, վերլուծաբան Արգիշտի Կիվիրյանն, անդրադառնալով կառավարության այսօրվա աղմկահարույց որոշմանը, ֆեյսբուքյան իր էջում գրել է. «Հայաստանի կառավարությունն այսօրվա նիստի ժամանակ որոշեց պետբյուջեից 12 միլիոն դրամ (մոտ 30 հազար դոլար) հատկացնել կրթության և գիտության նախարարությանը՝ ռուսաստանյան «Իգրա ԹիՎի» ընկերությունից «Ի՞նչ, որտե՞ղ, ե՞րբ» հաղորդաշարի ևս մեկ տարվա լիցենզիա ձեռք բերելու համար: Գումարը նվիրաբերության պայմանագրով կտրամադրվի «Փի-արտ» ընկերությանը: Մեկնաբանություներն ավելորդ են, ահա թե ոնց է հրապարակայնորեն մսխվում Հայաստանի պետական բյուջեի փողերը»...
Հիշեցնենք, որ «Ի՞նչ, որտե՞ղ, ե՞րբ» հաղորդումը բազմիցս քննադատությունների թիրախում է հայտնվել՝ ռուսերենով հեռարձակվելու համար:
Իր տեսակետն էր արտահայտել նաև ՀՅԴ անդամ Լիլիթ Գալստյանը՝ նշելով. «Կառավարության երեք անդամներով նստել եք հայերեն մտածում,ռուսերենով ԻՆՉ, ՈՐՏԵՂ, ԵՐԲ եք խաղում` որ ի՞նչ անեք։ Հայաստանի Հանրապետությունում պետական լեզուն հայերենն է, և այդ սրբազան նորմը առաջինը պիտի պահեն կրթության և արդարադատության նախարարները։ Իսկապես, չեմ հասկանում... իսկ Վրաստանում այս նույն խաղը վրացերենով են խաղում»։
Նշենք, որ համաձայն ՀՀ էլեկտրոնային ռեգիստորի տվյալների` «ՓԻ-ԱՐՏ» ՍՊԸ-ի սեփականատերերն են հանդիսանում Հրանտ Թոխատյանը` Հայաստանից և Թավադյան Արմենը` Ռուսաստանից:
