Հունվարի 23-ին 30 խմբում ընդգրկված հայաստանցի 108 գիտնական 5000 ԱՄՆ դոլարին համարժեք դրամի չափով դրամաշնորհներ ստացան Հայ օգնության ֆոնդի հովանու ներքո գործող Գիտության և կրթության հայկական ազգային հիմնադրամից՝ գիտական հետազոտություններ իրականացնելու համար:

Ի լրումն նշված դրամաշնորհների՝ ՀՀ նախագահի հովանու ներքո իրականացվող երիտասարդ գիտնականների աջակցության ծրագրի և Հայաստանի երիտասարդական հիմնադրամի համագործակցության շնորհիվ 2 լրացուցիչ դրամաշնորհ հատկացվեց նաև երիտասարդ գիտնականների հետազոտական խմբերի։ Այսպիսով Երիտասարդ գիտնականների աջակցության ծրագրի (ԵԳԱԾ) և Գիտության և կրթության հայկական ազգային հիմնադրամի (ԳԿՀԱՀ-ANSEF) երկամյա համագործակցության արդյունքում արդեն 7 դրամաշնորհ է հատկացվում երիտասարդ գիտնականների հետազոտական խմբերին։

Երիտասարդ գիտնականների աջակցության ծրագրի ղեկավար մարմնի անդամ Գևորգ Վարդանյանը նշեց, որ այս տարի ԵԳԱԾ կողմից տրամադրված դրամաշնորհները վերաբերում են կենսաբանության և ցեղասպանագիտության ոլորտներին։ Գևորգ Վարդանյանն ընդգծեց, որ այսօր դրամաշնորհ ստացող 30 գիտական խմբերի ղեկավարներից 19-ը մինչև 35 տարեկան երիտասարդներ են. «Սա ևս մեկ անգամ ապացուցում է, որ ունենք փայլուն երիտասարդ գիտնականներ, ովքեր ակտիվորեն զբաղվում են գիտական գործունեությամբ»։

ՀՕՖ-ի փոխտնօրեն, գիտական-կրթական ծրագրերի ղեկավար Էդուարդ Կարապետյանը տեղեկացրեց, որ այս տարի մրցույթին մասնակցել են 174 գիտական խմբեր, որոնցից հաղթող են ճանաչվել 30-ը։ 10 գիտական խմբեր բուհերից են, մյուսները՝ ԳԱԱ գիտահետազոտական ինստիտուտներից։ Դրամաշնորհային մրցույթում բնագավառների սահմանափակում չկա։ Շահողները տարբեր ոլորտներից են՝ ֆիզիկա, քիմիա, կենսաբանություն, կենսատեխնոլոգիա, աստղագիտություն, հայագիտություն և այլն։

ՀՕՖ փոխտնօրենն ընդգծեց, որ դրամաշնորհի հաղթողներին ընտրել է ԱՄՆ-ում գործող փորձագիտական հանձնախումբը, որը բաղկացած է միջազգային համբավ ունեցող գիտնականներից, երկուսը՝ Նոբելյան մրցանակակիրներ։ «Մեր գիտնականների աշխատանքները միջազգային բոլոր չափանիշներին համապատասխանում են, և կարող ենք հպարտանալ, որ այդպիսի գիտնականներ ունենք։ Սրանք ամպագոռգոռ բառեր չեն, դա ապացուցում են նրանց գիտական աշխատանքները»,- նշեց պարոն Կարապետյանը՝ ավելացնելով, որ անցած 15 տարիների ընթացքում ԳԿՀԱՀ հետազոտական խորհրդին ներկայացվել է մոտ 1800  դիմում-առաջարկ: Դրամաշնորհներ են ստացել 372 գիտական խմբեր, որոնցում ընդգրկված են եղել 1438 գիտնականեր: Ծրագրի դրամաշնորհային ընդհանուր գումարը կազմել է 1,86 մլն դոլար:

 Հայաստանի երիտասարդական հիմնադրամի

հասարակայնության հետ կապերի ծառայություն