Ըստ հարցումների՝ ընդդիմադիր ուժերն այս պահին հանրագումարում ունեն ավելի շատ ձայներ, քան Նիկոլ Փաշինյանը։ ԱԺ ճեպազրույցների ժամին հայտարարեց «Հայաստան» խմբակցության պատգամավոր Քրիստինե Վարդանյանը՝ պատասխանելով հարցին, թե ինչու իրենց հայտարարած հարցումների արդյունքները չեն հրապարակում։
«Քաղաքական ուժը հարցումներ իրականացնում է իր համար, և հրապարակել-չհրապարակելը իր որոշման տիրույթում է։ Մենք հարցումներ իրականացնում ենք մեզ համար՝ տեսնելու, թե մեր որ նարատիվներն ինչպես են աշխատում և որ ուղղությամբ պետք է շարունակենք աշխատանքները։ Եթե ձեզ շատ են հետաքրքրում հարցումների արդյունքները, ապա հրապարակենք մի դրվագ․ ոչ միայն մեր իրականացրած, այլ նաև մյուս հարցումներով Նիկոլ Փաշինյանը ոչ միայն չի կարողանում ձևավորել մեծամասնություն, այլ նաև ընդդիմադիր ուժերն այս պահին հանրագումարում ունեն ավելի շատ ձայներ, քան Նիկոլ Փաշինյանը»։
***
Նիկոլ Փաշինյանն ի՞նչ սոցիոլոգիական հարցումներ է ստանում, ինչպիսի՞ն է նրա մոտ պատկերը, որ որոշել է այս շրջանից սկսած՝ սեփական ժողովրդին սպառնալ պատերազմով․ ԱԺ ճեպազրույցների ժամանակ հայտարարեց «Հայաստան» խմբակցության պատգամավոր Քրիստինե Վարդանյանը։
«Ինչքան վատ պետք է լինի որևէ քաղաքական ուժի վիճակ, որ դիմի նման ծայրահեղ քայլի»,- ասաց նա։
Ընդդիմադիր պատգամավորի հաջորդ դիտարկումը վերաբերում էր հայտարարություններին, թե ՀՀ-ում առկա է հիբրիդային սպառնալիք, որի վերաբերյալ նույնիսկ Արտաքին հետախուզությունն էր առանձին հայտարարությամբ հանդես եկել՝ նշելով, որ բացահայտվել է կոնկրետ երկրի կողմից միջամտության դեպք։
«Ես հարց ունեմ «ինքնիշխաններին». եթե այդպես կոնկրետ դեպքեր են բացահայտվել, ինչո՞ւ եք կաշկանդված տալ այն պետության անունը, որը մեզ համար ներկայացնում է այդ սպառնալիքը։ Ինչպե՞ս կարող է ինքնիշխանությունն ունենալ սահմանափակում, ինչի՞ց եք վախենում»,-հարցեր հնչեցրեց նա։
Երրորդ դիտարկումն էլ վերաբերում էր այն հայտարարություններին, թե իշխանությունը պնդում է, որ «Հայաստան» խմբակցությունը գալու է և «Գյումրի-2» սցենար է իրականացնելու, միաժամանակ նշում են, թե «Հայաստան» խմբակցությունը շեմը հաղթահարելու հնարավորություն չունի։
«Կողմնորոշվեք՝ շեմը չենք հաղթահարելո՞ւ, թե՞ «Գյումրի-2» ենք անելու»,- նշեց նա։
