Արդեն տեղեկացրել ենք, որ ֆեյսբուքյան ուղիղ եթերի ժամանակ ՀՀ վարչապետի պաշտոնակատար Նիկոլ Փաշինյանը ներկայացրեց, թե ինչ քննարկումեր են տեղի ունեցել նրա և Ռուսաստանի Դաշնության նախագահ Վլադիմիր Պուտինի միջև:

«Ստացվել է այնպես, որ մեր հանդիպումները ՌԴ նախագահի հետ բավականին հաճախ են տեղի ունենում և դա խոսում է մեր հարաբերությունների առանձնահատուկ և ռազմավարական բնույթի մասին»,- նշեց Փաշինյանը:

ՀՀ վարչապետի պաշտոնակատարի խոսքերով՝ քննարկվել է երկկողմ և բազմակողմ հարաբերություններին վերաբերող հարցերի շատ լայն շրջանակ:

«Գազի թեմայի հետ կապված որոշում չկա և գազի վերաբերյալ քննարկումները կշարունակվեն աշխատանքային կարգով: Իհարկե, արձանագրվեց, որ երկկողմ հարաբերությունների համար դա չափազանց զգայուն թեմա է, և այդ զգայունությունը գիտակցում են թե՛ Հայաստանի Հանրապետության կառավարությունում, թե՛ Ռուսաստանի Դաշնությունում, բայց ընդհանուր առմամբ ես լավատես եմ տրամադրված նաև այս թեմայի շուրջ և հույս ունեմ, որ այստեղ նույնպես մեզ համար ցանկալի զարգացումներ կլինեն, կամ առնվազն անցանկալի զարգացումներ չեն լինի»,- եզրափակեց վարչապետի պաշտոնակատարը:

Հիշեցնենք, որ 2013 թվականի դեկտեմբերի 2-ին Երևանում ստորագրվեց մեծ աղմուկ բարձրացրած «գազային» պայմանագիրը, որն ուներ 2 բաղադրիչ՝ համաձայնագիր «ՀայՌուսգազարդի» բաժնետոմսերի վաճառքի ու գործունեության պայմանների մասին, ինչպես նաև համաձայնագիր գազի գների ձևավորման կարգի մասին: Երկրորդ համաձայնագրով ամրագրվեց Հայաստան առաքվող գազի գինը սահմանին՝ մինչև 2018 թվականի դեկտեմբերի 31-ը: Սկզբում դա 1000 խորանարդ մետրի դիմաց 190 ԱՄՆ դոլար էր, հետո դարձավ 165, իսկ հետո նվազեց՝ մինչև 150: Սակայն հաշված օրեր անց համաձայնագրի այս հատվածը կդադարի գործել, ուստի, արդեն մի քանի ամիս է, ինչ կողմերը համապատասխան գերատեսչությունների մակարդակով նոր գին են բանակցում:

Կարդացեք նաև՝ Նիկոլ Փաշինյանի կատակը՝ Վլադիմիր Պուտինի հետ

Կարդացեք նաև՝Ես հենց նոր մտա տուն՝ Մոսկվայից...Նիկոլ Փաշինյանն ուղիղ եթերում պատմել է մոսկովյան այցի մասին

Կարդացեք նաև՝ Մոսկվան եւ Երեւանը ՀԱՊԿ գծով պետք է անվտանգության ոլորտում պահպանեն համագործակցությունը.Պուտին