Բելառուսի նախագահ Ալեքսանդր Լուկաշենկոն անհրաժեշտ է համարում գործադրել բոլոր ջանքերը Հայաստանի և Ադրբեջանի միջև հակամարտությունը կարգավորելու համար։
Խոսելով առկա մարտահրավերների և վտանգների մասին` Լուկաշենկոն փաստել է, որ ոչ հեշտ իրավիճակ է ձևավորվում նաև ՀԱՊԿ–ում։ Նրա կարծիքով` Կազմակերպության անդամ երկրների ներսում իրավիճակը փորձում են ապակայունացնել։ Այս համատեքստում նա նշեց իրադարձությունները Ղազախստանում, Ուկրաինայում, հայերի և ադրբեջանցիների միջև հակամարտությունը։
«Կրկնեմ` ինչ եմ ասել հոկտեմբերի 28-ին ՀԱԽ–ի արտահերթ նստաշրջանի ժամանակ. մենք ուզում ենք, որ հակամարտությունը երկու հարևան և մեզ համար բարեկամական պետությունների (Հայաստանի և Ադրբեջանի – խմբ.) միջև կարգավորվի խաղաղ ճանապարհով», – «Բելտա»–ի փոխանցմամբ ՀԱՊԿ Հավաքական անվտանգության խորհրդի նեղ կազմով նիստի ժամանակ ասել է Լուկաշենկոն։ Բելառուսի նախագահը մեկնաբանել է ՀՀ վարչապետ Նիկոլ Փաշինյանի հայտարարությունն այն մասին, որ ՀԱՊԿ–ում Հայաստանի անդամակցությունը Ադրբեջանին հետ չպահեց ագրեսիայից։
«Կարծում եմ, որ համընդհանուր կարծիք կարտահայտեմ, ասելով, որ մենք անմասն չենք։ Այնպես չէ, ինչպես այստեղ ասաց Նիկոլ Վովաևիչը, որ ՀԱՊԿ–ը Ադրբեջանին ագրեսիայից հետ չպահեց։ Մեր գործը չէ որևէ մեկին հետ պահելը։ Սակայն փաստացի մենք պետք է արձագանքենք և մենք պատրաստ ենք արձագանքելու», – կարծում է Լուկաշենկոն։ Նա հիշեցրել է, որ ՌԴ–ն այսօր միջնորդի առաքելություն է կատարում այս հարցում, ինչի հետ համաձայնել է և՛ Հայաստանը, և՛ Ադրբեջանը։ Լուկաշենկոն առաջարկել է շարժվել այս ուղղությամբ և անել ամեն բան, որպեսզի մարդիկ չզոհվեն։ Ըստ նրա` դա դրական կընդունվի ինչպես հայկական, այնպես էլ ադրբեջանական հանրության շրջանում։
«Այո, Նիկոլ Վովայի, կան նրբություններ և գուցե, լուրջ։ Սակայն մենք կարող ենք այդ հակամարտությունը, որը կարող է կրկին սրվել, արմատապես կարգավորել այսօր։ Նախևառաջ Հայաստանի ղեկավարության ցանկության դեպքում։ Դե, բնական է նաև Ադրբեջանի։ Ի դեպ, ես խոսելու եմ այդ մասին։ Դա Բելառուսի նախագահության առաջնահերթություններից մեկն է։ Մենք չպետք է աչք փակենք դրա վրա։ Կկարողանանք լուծել այդ խնդիրը կամ ոչ, սակայն դա պետք է լինի ՀԱՊԿ ուշադրության կենտրոնում», – ընդգծել է Բելառուսի առաջնորդը։ Նրա խոսքով` «հայերը մեզ օտար մարդիկ չեն, և մենք ուզում ենք աջակցել նրանց»։ Բայց այդ հարցում, Բելառուսի նախագահի համոզմամբ, շարժ է պետք նախևառաջ Հայաստանի կողմից։ Միևնույն ժամանակ նա տարակուսանք է հայտնել հակամարտության կարգավորման հարցում ԵՄ–ի և ԵԱՀԿ–ի դերի վերաբերյալ։
«Սակայն այս կապակցությամբ ես չեմ հասկանում, գուցե, որևէ մեկը պարզաբանի, ինչու են այստեղ, Ռուսաստանից բացի, որը ներգրավված է միջնորդությանը, նաև ԵՄ–ն և ԵԱՀԿ–ն։ Որպեսզի շարունակեն սեպ խրե՞լ մեր՝ դաշնակիցների հարաբերությունների մեջ։ Պատմության մեջ միշտ այդպես է եղել։ Մենք գիտենք` ինչի է հանգեցնում նման կարգի «միջնորդությունը»։ Պարզապես այս հակամարտությունն առնվազն կսառեցվի կրկին երկար տարիներով։ Նրանց մեր տարածաշրջանում կայունություն և խաղաղություն հարկավոր չէ, այլ պետք է իրենց կողմից կառավարվող փլուզում», – կարծում է Լուկաշենկոն։
