Ազգային անվտանգության ծառայության աշխատակիցները վերջին օրերին քաղաքացիական ակտիվիստների են հրավիրում իրենց մոտ` զրույցի: Այս մասին այսօր ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին և կից նախագծերի օրենքների փաթեթի քվեարկությունից առաջ ասաց ՀԱԿ խմբակցության անդամ Նիկոլ Փաշինյանը:
Վերջինիս խոսքով` իրեն անընդհատ ահազանգում են մարզերից, որ քաղաքացիական հագուստով ԱԱԾ աշխատակիցները ընդդիմադիր ակտիվիստներին հրավիրում են «զրույցների», քննարկումների.
«Սա հետապնդում է նրանց քաղաքական եւ հասարակական գործունեության համար, սա բացահայտ ապօրինություն է: Ես հորդորում եմ Ազգային անվտանգության ծառայողներին` զերծ մնալ, դադարեցնել իրենց ապօրինի գործունեությունը»:
«Ամբողջ Ազգային ժողովը ձեր խոսքից հետո խառնվեց իրար, չեմ հասկանում` ինչի»,-այսպես արձագանքեց Փաշինյանի ելույթին ԱԺ նախագահ Գալուստ Սահակյանը:
Հիշեցնենք, որ օրեր առաջ երաժիշտ Վահան Արծրունին ՀՀ Ազգային անվտանգության ծառայություն է հրավիրվել, որտեղ ոմն Գրիգոր նրան հարցեր է տվել Հիմնադիր խորհրդարանի անդամների հետ կապերի, Խորենացի փողոցում ամռանն անցկացվող բողոքի ակցիաներին մասնակցության, ապրելու միջոցների, ընտանիքի մասին:
Արծրունին չի կարողացել պարզել, թե ինչ գործի շրջանակներում է հրավիրվել ԱԱԾ. նրան ասել են, որ «ուղղակի զրույց է»:
