D’Black Blues Orchestra խումբը Էրիկ Կլեպտոնի 70ամյակին նվիրված համերգով փետրվարի 14-ին հանդես կգա Կ. Դեմիրճյանի անվան մարզահամերգային համալիրում: Համերգին կմասնակցի նաև Հայաստանի պետական երիտասարդական նվագախումբը:
«Սա մեր առաջին հանդիպումն է, Սերգեյ Սմբատյանի հետ հենց նոր ծանոթացանք: Շատ լավ է, որ դիրիժորը երիտասարդ է»,-այսօր՝ լրագրողների հետ հանդիպման ժամանակ ասաց խմբի ղեկավար և մենակատար Վլադիմիր Ավետիսյանը՝ հավելելով.
«D’Black Blues Orchestra-ի հայաստանյան համերգային երեկոյի ընթացքում կհնչեն կատարումներ Կլեպտոնի երգացանկից, Բոբ Մառլիի ստեղծագործություններից: Ուստի, շատ գաղտնիքներ չեմ բացում.Լավ է մեկ անգամ տեսնել և լսել: Երաժշտության մասին պատմել հնարավոր չէ»:
ՀՊԵՆ գեղարվեստական ղեկավար և գլխավոր դիրիժոր Սերգեյ Սմբատյանն էլ նշեց, որ հնչելու են սիրո, ազատության և երջանկության մասին երգերը: Խմբի անդամները Ռուսաստանից են, ԱՄՆից, Բելգիայից, Շվեյցարիայից և Իսպանիայից:
Նշենք, որ 2000 թվականին ստեղծված D’Black Blues Orchestraն ելույթ է ունենում աշխարհի տարբեր երկրներում` ներկայացնելով դասական բլյուզային և ջազային ստանդարտներ` թարմ մոտեցմամբ: Երաժիշտներն անհամբերությամբ են սպասում հայ հանդիսատեսի հետ հանդիպմանը:
Անի Կարապետյան
