«Ես որեւէ մեկի դեմ ցուցմունք չեմ տվել: Ցուցմունք ընդհանրապես չեն տալիս ինչ-որ մեկի դեմ կամ կողմ: Այլ ընդամենը տալիս են ինֆորմացիա իրենց տեղեկացվածության մասին»,- այս մասին այսօր լրագրողների հետ զրույցում ասաց ՀՀ առողջապահության նախարար Արսեն Թորոսյանը՝ անդրադառնալով մամուլում տարածված այն տեղեկությանը, թե ինքը Դավիթ Սանասարյանի դեմ ցուցմունք է տվել:
Արսեն Թորոսյանը նշեց, որ ցանկացած բան, ինչ ինքը գիտի՝ հասանելի է լինելու իրավապահ մարմիններին. «Դավիթ Սանասարյանի գործին ես ամբողջությամբ չեմ տիրապետում և չպիտի տիրապետեմ, բացի այդ, կա նախաքննական գաղտնիք, որը չպիտի հրապարակվի»,-ասաց Արսեն Թորոսյանը:
Հարցին, թե որպես նույն թիմի անդամ հավատո՞ւմ է արդյոք Դավիթ Սանասարյանին, և ինչպիսի՞ն են իր զգացողություններն այն առումով, որ գուցե իր ցուցմունքը վնասել է Դավիթ Սանասարյանին, Արսեն Թորոսյանը ընդգծեց. «Ես ենթադրություններով չեմ առաջնորդվում, այլ առաջնորդվում եմ հետևյալ սկզբունքով` «Պլատոնն իմ ընկերն է, բայց ճշմարտությունն ավելի թանկ է»: Որպես նախարար՝ ես չունեմ հարազատ, բարեկամ և ընկեր»,-ասաց Արսեն Թորոսյանը` նշելով, որ Դավիթ Սանասարյանի հետ մտերիմ է եղել և հիմա էլ է մտերիմ:
Հիշեցնենք, որ ապրիլի 18-ին ՀՀ պետական վերահսկողական ծառայության պետ Դավիթ Սանասարյանին մեղադրանք էր առաջադրվել պաշտոնեական լիազորությունները չարաշահելու համար: Նրա նկատմամբ որպես խափանման միջոց է ընտրվել չհեռանալու մասին ստորագրությունը: Դավիթ Սանասարյանի լիազորությունները ժամանակավորապես դադարեցվել են։
Հավելենք, որ ըստ մամուլում շրջանառվող տեղեկությունների՝ Դավիթ Սանասարյանի մասնակցությամբ կաշառք վերցնելու տեսանյութ է առկա:
Սանասարյանը հերքել է այդ տեղեկատվությունը, իսկ ասուլիսի ժամանակ հայտարարել է, որ այն աղբյուրը և այն լրատվամիջոցը, որն առաջինը կտեղադրի իր մասնակցությամբ կաշառք վերցնելու տեսանյութը, ինքը հենց այդ լրատվամիջոցում էլ կկտրի իր ձեռքը:
Կարդացեք նաև՝ Փաշինյանը՝ Սանասարյանի շուրջ ծավալվող քննարկումների մասին
Իմ դեմ իրականացվողը շինծու է, անգամ ապացուցման կարիք չունի. Դավիթ Սանասարյան
