ՀՀ արտաքին գործերի նախարարության մամուլի խոսնակ Տիգրան Բալայանն այսօր լրագրողների հետ ճեպազրույցում անդրադարձավ հրապարակումներին, որոնցում քննադատության է արժանացել Սլովակիայում ՀՀ դեսպանը և խոսվում է վերջինիս՝ Ադրբեջանի կողմից Սլովակիայից զենք գնելու դեմ քայլեր չձեռնարկելու մասին:
«Սլովակիայից Ադրբեջան զենքի ապօրինի մատակարարումների հետ կապված դեռ անցյալ տարվանից լայնածավալ աշխատանք է կատարվել, և հենց այս պահին նույնպես աշխատանքներ են ընթանում: Այս պահին մեր դեսպանը շատ կարևոր հանդիպում է ունենում:
Փառք Աստծո, կասկածելի վարկանիշով մարդիկ այդ աշխատանքների մանրամասներին տեղյակ չեն, խորհուրդ կտամ` դուք էլ ուշադրություն չդարձնեք այդ կարգի մարդկանց հրապարակումներին: Կարծում եմ՝ դա արվում է զուտ իրենց վրա ուշադրություն հրավիրելու նպատակով:Թե՛ Չեխիայում, թե՛ Սլովակիայում մեր դեսպանությանը հավաստիացրել են, որ քննություն է ընթանում մատակարարումների հետ կապված: Խնդիրն այն է, որ այդ զինատեսակների մատակարարման վերջնական օգտագործման վկայականը տրված է մեկ երկրի, բայց զենքը հայտնվել է մեկ այլ երկրում, ինչն էլ ԵՄ համապատասխան կարգավորումների կոպտագույն խախտում է: Քննությունն այս պահին ընթանում է, հուսամ՝ շուտով մեղավորներն արժանի պատիժ կստանան, տարբեր հարթակներով աշխատանք տարվում է և անցյալ տարվանից»:
