Այսօր Կառավարության նիստի ժամանակ նախարար Արսեն Թորոսյանն Հարկային օրենսգրքի նախագծի փոփոխության մասին առարկություն ներկայացրեց: Մասնավորապես, նրա խոսքով՝ ծխախոտի ակցիզային հարկը 8500 դրամից դարձել է 2500 դրամ: Նախարար Թորոսյանն ասաց, որ սրա մասին առավոտյան 9:00-ին են տեղեկացել, որն իր համար ընդունելի չէ ու տեղյակ չի եղել:
Նախարարի այս խոսքը զայրացրեց վարչապետին: Նա ասաց, որ իր համար անհասկանալի է՝ ի՛նչ է նշանակում նախարարը տեղյակ չի եղել.
«Դուք առաջարկում եք՝ եկեք ժամանակի մեքենա մտածենք, հայտնվենք մի իրավիճակում, որը ճիշտ կլինի: Ինչի՛ չեք առաջարկում ծխախոտի արտադրությունը արգելել»,- ասաց գործադիր մարմնի անդամը:
Փաշինյանը հիշեցրեց՝ մի քանի անգամ Թորոսյանի հետ է խոսել այս թեմայով: Նախարարն էլ հակադարձեց՝ թվի մասին առաջին անգամ է տեղյակ եղել: Հետո էլ ասաց՝ կարծիք հայտնել չի՞ կարելի:
Փոխվարչապետ Մհեր Գրիգորյանն էլ ասաց, որ Արսեն Թորոսյանը ցանկանում է բոլոր խնդիրները Հարկային օրենսգրքով լուծել, մինչդեռ նախարարությունը թող արգելի բուժհաստատություններում ծխելը, կոկա-կոլա վաճառելը, հետո թող դրսեւորվեն Հարկային օրենսգրքում:
Թորոսյանը հակադարձեց՝ բուժհաստատություններում արգելված է ծխելը:
Մհեր Գրիգորյանն էլ առաջարկեց պատահականության սկզբունքով գնալ ու տեսնել՝ իրականում ի՛նչ է կատարվում: Նախարարը հակադարձեց՝ վարչարարություն չեն կարող իրականացնել, հիվանդանոցներն իրենց սեփականությունը չեն, դա իրավապահների՝ ոստիկանության գործն է:
«Հայաստանի Հանրապետությունը մեր սեփականությունը չէ, բայց կարգավորում ենք»,- հակադարձեց Նիկոլ Փաշինյանը:
«Պարո՛ն Օսիպյան, ինչո՛ւ վարչարարություն չեք անում»,- հարցրեց Նիկոլ Փաշինյանը ՀՀ ոստիկանության պետ Օսիպյանին:
Լսելի չէր հստակ, թե ի՛նչ ասաց Օսիպյանը, բայց Փաշինյանի արձագանքից պարզ էր՝ երեխաները սիրում են կոկա-կոլա:
«Երեխաները ծխել էլ են սիրում»,- ծիծաղելով ասաց վարչապետը:
Փոխվարչապետն ասաց, որ Հարկային օրենսգրքի նախագծում փոփոխություն, երեւի, անցյալ շաբաթ է եղել:
Նիկոլ Փաշինյանն էլ ասաց՝ հավասարակշռված մոտեցում պետք է լինի.
«Կգաք ինձ մոտ, կքննարկենք, որոշում կկայացնենք»,- ասաց նա:
Նախագիծը դրվեց քվեարկության: Կառավարությունը միաձայն այն ընդունեց:
