Կառավարությունն իր այսօրվա՝ հունիսի 28-ի նիստում որոշում կայացրեց, որով վարչապետի աշխատակազմի տեղակայման վայր է սահմանվում Հանրապետության հրապարակի Կառավարական տուն 1-ը:
Արտակ Զեյնալյանը նեկայացրեց վարչապետի աշխատակազմի տեղակայման վայրը սահմանելու մասին որոշման նախագիծը:
Նա նշեց, որ հաշվի առնելով վերոշարադրյալը` անհրաժեշտություն է առաջացել մշակելու «Վարչապետի աշխատակազմի տեղակայման վայրը սահմանելու մասին» Կառավարության որոշման նախագիծը, որում հստակ շարադրվել են տեղակայման վայրերը: Նախագիծը մշակելիս ուսումնասիրվել և հաշվի է առնվել «Վարչապետի աշխատակազմի կանոնադրությունը և կառուցվածքը հաստատելու մասին» վարչապետի որոշումը, որի 7-րդ կետում նշված է, որ աշխատակազմի գտնվելու վայրն է Հայաստանի Հանրապետություն, քաղ. Երևան, Մարշալ Բաղրամյան պողոտա 26 և Հանրապետության հրապարակ, Կառավարական տուն 1:
Խնդրին անդրադարձավ նաեւ ՀՀ վարչապետ Նիկոլ Փաշինյանը՝ նշելով, որ այս որոշումն ընդունվում է օրենքի պահանջը տեխնիկապես կատարելու համար:
«Տարօրինակ իրավիճակ է, երբ վարչապետը երկու շենքում է գտնվում: Մենք, ամենեւին, չենք մոռացել, թե ինչն ենք քննադատել: Հիմա քննադատություն է հնչում, որ կառավարություն գալով մենք մոռացել ենք, թե ինչն ենք քննադատել, դա ամենևին այդպես չէ: Այն, ինչ քննադատել ենք, ժամանակի ընթացքում իրականություն կդարձնենք։ Կարծում եմ, որ վարչապետը պետք է հրաժարվի Բաղրամյան 26-ի նստավայրից, և այդ նստավայրը մենք կվերադարձնենք ՀՀ նախագահին, ինչպես նախկինում եղել է: Այս պահին մենք մի քանի խնդիրներ ունենք լուծելու:
Սահմանադրությամբ վարչապետն է պետության ղեկավարը և արարողակարգային որոշակի պարտականություններ կան, որը կապված է շենքային պայմանների հետ: Հնարավորինս կարճ ժամանակում այս հարցը կլուծենք: Ես տևական ժամանակ է, աշխատում եմ Կառավարությունում, դա նաեւ հարմար է եւ այս հարցում ինստիտուցիոնալ մոտեցում կցուցաբերենք: Վարչապետը կունենա մեկ նստավայր, իսկ Բաղրամյան 26-ը կվերադարձվի նախագահի աշխատակազմին»: