Վարչապետ Նիկոլ Փաշինյանի կինը` Աննա Հակոբյանը, իր ֆեյսբուքյան էջում ԶԼՄ-ների համար պարզաբանում է ներկայացրել վերջին օրերին քննարկման առիթ դարձած մի դեպքի վերաբերյալ:
«Նարե Գրիգորյանին առաջարկել եմ աշխատանք «Հժ»-ում: Կառավարությունում աշխատանքը վերականգնելու հարցում օգնելու որևէ խոստում չեմ տվել: Հարցրել եմ մտադրություն ունի՞ փորձել վերականգնվել դատարանի միջոցով, թե՞ ոչ, եթե ոչ, ապա առաջարկում եմ աշխատանք «Հայկական ժամանակում»:
Հ.Գ. Զրույցի վերջում Նարեն հարցրեց կարո՞ղ է արդյոք հանրայնացնել մեր խոսակցությունը, ես պատասխանեցի, որ դեմ չեմ, միայն թե՝ ընդհանուր գծերով՝ մասնավոր բնույթի եմ խոսել, քանի որ նախապես չէի մտածում, որ կհանրայնացվի: Իմ այս խնդրանքի արդյունքում, փաստորեն, կարևոր դետալներ դուրս էին մնացել, և սխալ տպավորության տեղիք տվել: Կպատահի, ոչինչ»,- գրել է նա:
Ավելի վաղ իր ֆեյսբուքյան էջում գրառում էր արել Նարե Գրիգորյանը:
«Սիրելի բարեկամներ:
Րոպեներ առաջ ինձ զանգահարեց առաջին տիկին Աննա Հակոբյանը:
Նա ավելի մանրամասն տեղեկացավ իմ խնդրի մասին և ասաց, որ կարող է օգնել թե՛ աշխատանքը վերականգնելու, թե՛ նոր աշխատանք գտնելու հարցում:
Ես շնորհակալություն հայտնեցի և ասացի, որ կմտածեմ և իրեն տեղյակ կպահեմ»,-գրել էր Նարե Գրիգորյանը:
Հիշեցնենք` որ սեպտեմբերի 24-ին Գրիգորյանը իր ֆեյսբուքյան էջում «Այսօրվանից գործազուրկ եմ – Նիկոլի ականջը կանչի» վերտառությամբ գրառում էր կատարել, որով տեղեկացրել էր, որ վարչապետի աշխատակազմի գործերի կառավարիչ Վահան Պապիկյանն իրեն ստիպել է աշխատանքից ազատվելու դիմում գրել:
Գրիգորյանի խոսքով` իրեն աշխատանքից ազատելու պատճառն այն էր, որ ինքը, ունենալով անչափահաս երեխա, հրաժարվել էր երեկոյան արտաժամյա աշխատանք կատարել և այդ մասին տեղյակ էր պահել աշխատակազմի ղեկավար Էդուարդ Աղաջանյանին:
««Դու ինձ վրա բոչկա ես գլորել, թռել ես իմ գլխի վրայով», – ինձ ասաց Վահան Պապիկյանն ու ազատեց աշխատանքից՝ իմանալով, որ ես միայնակ մայր եմ և եկամուտի ուրիշ ոչ մի աղբյուր չունեմ»,- գրել էր նա: Գրիգորյանը նաև բաց նամակով դիմել էր Փաշինյանին` խնդրելով արձագանքել:
