Նիկոլ Փաշինյանն այսօր ընտրվեց Հայաստանի վարչապետ. Կողմ՝ 59, դեմ՝ 42 ձայներով
ԱԺ հատուկ նիստին այսօր սկսվեց վարչապետի պաշտոնում Նիկոլ Փաշինյանի թեկնածության 2-րդ փուլով քննարկումը։ Նիկոլ Փաշինյանն իր ելույթում նշեց, որ այսօր` Շուշիի ազատագրման օրը, դե յուրե արձանագրվելու է համազգային շարժման հաղթանակը. «Հայ ժողովուրդն այսօր նույնքան ոգեւորված ու հաղթանակած է, որքան այդ օրերին, քանի որ վստահություն ունօ դեպի ապագան ու հավատում է իր ուժերին: ՀՀ-ում արտոնյալներ չեն լինելու եւ վերջ, արհեստական մենաշնորհներ չեն լինելու եւ վերջ, արմատախիլ է արվելու կոռուպցիան եւ վերջ, հաստատվելու է օրենքի գերակայություն եւ վերջ։ Շրջադարձային փոփոխություններ է կատարելու մեր Կառավարությունը։
Օրենքը բոլորի համար պետք է հավասար լինի քաղաքական մերձավորների ու հակառակորդների համար։ Սփյուռքում գտնվողներ սիրելի հայրենակիցներ, ձեր վերադարձի ժամը եկել է, ես կլինեմ երաշխավորը բոլոր տեսակի խոչընդոտների ու ապօրինությունների վերացման, ու այս գործընթացն անմիջապես պետք է սկսել, սա անվտանգության հարց է նաեւ»: Նա մի քանի կետով ներկայացրեց իր ծրագրի առաջնահերթությունները. «Ռազմարդյունաբերական համալիրի կայացում, բարձր տեխնոլոգիաների զարգացում, նոր հեղափոխական գաղափարներ, ՀՀ-Ադրբեջան` խախտված ռազմական հավասարակշռության վերականգնում»: Նրա մյուս առաջնահերթությունը գյուղատնտեսությունն է` ոռոգման ջուրը նույնքան հասանելի ու տարածված պետք է լինի, որքան եղավ էլեկտրաէներգիայն, զարգանա կաթիլային համակարգը։ Զբոսաշրջությունը եւս կլինի Նիկոլ Փաշինյանի առաջնահերթությունը. «Բոլորը կձգտեն գալ ՀՀ` տեսնելու, թե այդ ինչ երկիր է, որտեղ նման թավշյա, սիրո եւ համերաշխության մթնոլորտում հեղափոխություն եղավ»:
Ըստ նրա` պետությունը պետք է սիրի իր քաղաքացուն, քաղաքացին էլ` պետությանը. «Պետությունն իր քաղաքացուն պատժիչ համակարգից պետք է վերածվի համագործակցող, օժանադակողի։ Կրթական հաստատություններում կուսակցականության արատավոր երեւույթը պետք է վերացվի, դա է վկայում մեր շարժման ակտիվ մանսակցած աշակերտների ու ուսանողների թիվը։ Կանայք ավելի մեծ ընդգրկում ունենան հասարակական, պետական կառավարման համակարգում։ Նոր Հայաստանում կանայք դարձել են հզորագույն գործոն։ Ես` որպես ժողովրդի կողմից ընտրված վարչապետ, ուզում եմ քաջալերել նրանց` շարունակել ժամանակ տրամադրել հանրային գործունեությանը, քանի որ նրանց շնորհիվ էլ ավելի է ուժեղանալու մեր երկիրն ու ընտանիքը»:
Սակայն, ըստ նրա, այս ամենի սկիզբը կլինեն ԸՕ փոփոխությունները, քանի որ հենց այստեղից է շեղվել մարդկանց բարոյահոգեբանական մթնոլորտը. «Եվ սեղմ ժամկետներում ազատ, արդար, թափանցիկ ընտրությունների անցկացման։ Վերադարձ հնին այլեւս չի լինելու, մեր երկրում էլ տեղ չունի հուսահատությունը, մեր երկիրը կանգնած է բաց ճակատով ու ամուր ողնաշարով։ Քննադատությունը չի դիտարկվելու որպես անվտանգությունը խաթարող գործոն։ Մենք պետք է օր առաջ պետք է ազատվենք քաղբանտարկյալ ունեցող երկրի արատավոր խարանից։ Եւ ուրեմն, կեցցե ազատությունը, կեցցե ՀՀ-ն, եւ կեցցեն մեր երեխաները, որոնք ապրելու են ազատ երկրում»:
Նշենք, որ Նիկոլ Փաշինյանն այսօր ընտրվեց Հայաստանի վարչապետ. Կողմ՝ 59, դեմ՝ 42
Ստորև ներկայացվող տեսանյութում դիտեք, թե ինչպես Հնարապետության հրապարակում հավաքված հազարավոր մարդիկ արձագանքեցին Նիկոլ Փաշինյանի ընտրությանը:
Հիշեցնենք, որ այսօր ԱԺ-ում էր նաև աշխարհահռչակ ռոք երաժիշտ Սերժ Թանկյանը, ով երեկ էր ժամանել Հայաստան և Նիկոլ Փաշինյանի հետ ելույթ ունեցել Հանրապետության հրապարակում:
