Կոտայքի մարզից սուր սննդային թունավորում ախտորոշմամբ 11 քաղաքացի օգոստոսի 1-ի լույս 2-ի գիշերը դիմել է «Նորք» ինֆեկցիոն, 19-ը` «Սուրբ Գրիգոր Լուսավորիչ» և 2-ը` Մասիսի բժշկական կենտրոններ: Բոլորը մասնակցել են միևնույն միջոցառման: 

Ինչպես տեղեկացնում է ՀՀ առողջապահության նախարարության կայքը, նախարար Արմեն Մուրադյանի հանձնարարությամբ նախարարի տեղակալ Գագիկ Միրիջանյանը, ՀՀ ԱՆ Հիվանդությունների վերահսկման և կանխարգելման ազգային կենտրոնի տնօրեն Արտավազդ Վանյանը և ՀՀ ԱՆ առողջապահական պետական տեսչության պետ Արտակ Սահակյանն այցելել են բժշկական կենտրոններ, ծանոթացել հիվանդների առողջական վիճակին: 

Բժշկական հաստատություններում կատարվել են համաճարակաբանական բոլոր  անհրաժեշտ հետազոտություններն ու միջոցառումները: 

Հոսպիտալացված հիվանդների մեծ  մասն առողջացումով դուրս է գրվել: Այս պահին բուժումը շարունակում է տասը հիվանդ`  5 -ը «Նորք» ինֆեկցիոն հիվանդանոցում և 5-ը «Սուրբ Գրիգոր Լուսավորիչ» բժշկական կենտրոնում: Նրանց մոտ ևս առկա է դրական շարժընթաց: Հիվանդների առողջական վիճակը գտնվում է ՀՀ ԱՆ գլխավոր ինֆեկցիոնիստ Արա Ասոյանի անմիջական հսկողության ներքո: 

Հաշվի առնելով հանրապետությունում շոգ կլիմայական պայմանները` ՀՀ առողջապահության նախարարությունը կրկին հորդորում է բնակչությանը հետևել ճիշտ սննդակարգին, խուսափել ժամկետանց սնունդ օգտագործելուց, չսնվել պատահական վայրերում: