2016 թվականին մի խումբ քաղաքացիներ հանդես եկան կենդանի հերոսներին նվիրված պուրակ ստեղծելու առաջարկով: Հիմքում հերոսներին երախտագիտություն հայտնելն էր: Պուրակում պետք է լինեին դեկորատիվ ու պտղատու ծառեր, ծաղիկներ, ցայտաղբյուր: Ծառերը խորհրդանշելու էին կյանքի վերածնունդն ու շարունակությունը, իսկ ցայտաղբյուրը՝ հավերժություն:
Նախատեսում էին բացումը կատարել 2017 թվականի ապրիլի 2-ին, սակայն չստացվեց.տարածք չէին գտել:
Կազմակերպիչներից մեկը՝ Կարինե Փանոսյանը, Asekose.am-ի թղթակցի հետ զրույցում ասաց, որ հարցն արդեն լուծվել է.
«Մենք սկզբում դիմել էինք Երևանի քաղաքապետարան, սակայն տարածք հատկացնելու հետ կապված խնդիրներ առաջացան։ Հույսներս չկտրեցինք, շարունակեցինք փնտրտուքները: Արդյունքում մեզ ձեռք մեկնեց Փարաքարի համայնքի ղեկավար Սամվել Վարդանյանը, ով հետաքրքրված է էկո նախագծերով, կարևորում է ակտիվ երիտասարդների մասնակցությունը համայնքի կյանքին»։
Կարինեի փոխանցմամբ՝ նախագծի համար հիմք է հանդիսացել Անի Գևորգյանի «Ծառեր դամբարանների փոխարեն» ծրագիրը.
«Մինչ զբաղվում էինք այդ ծրագրով՝ տեղի ունեցավ ապրիլյան քառօրյա պատերազմը։ Ռազմագետ Արմեն Սարգսյանն առաջարկեց ինչ-որ թեմատիկ պուրակ ստեղծել: Երևանի ավագանու անդամ Անահիտ Բախշյանն էլ կոչ արեց ծառերի տեսքով կենդանի կոթողը նվիրել կենդանի հերոսներին: Քանի որ արդեն ունենք տարածք, մարտի 31-ին նախատեսում ենք շաբաթօրյակ, որից հետո արցախյան պատերազմի հերոսներին խնդրելու ենք, որպեսզի գան ու իրենց անվանական ծառը տնկեն: Բացումը կլինի ապրիլի 2-ին՝ Հուշարձանների փողոցում»։
Հարցին՝ ինչպե՞ս են պատկերացնում պուրակի վերջնական տեսքը, Կարինե Փանոսյանը պատասխանեց.
«Փնտրում ենք լանդշաֆտային դիզայների, ով կկազմի մակետը: Սկզբունքորեն միայն մեկ ցայտաղբյուր պետք է լինի, իսկ ջրի աղբյուրները, եթե անցկացնենք, ապա կավաշեն առուներ կլինեն, իսկ ճանապարհներին մեծ, բնական քարեր կհավաքենք։ Առավելապես կանաչ ու որևէ հակաէկոլոգիական շինանյութ չի օգտագործվելու»։
Անի Կարապետյան
