«Աբսուրդը հասել է նրան, որ ԱԺ փոխնախագահի աթոռը զբաղեցնողը Սրբազանի շինծու գործը համեմատում է Բեն Լադենի հետ»,- հայտարարեց ընդդիմադիր պատգամավոր Լևոն Քոչարյանը՝ անդրադառնալով Վահագն Ալեքսանյանի այսօրվա հայտարարությանը: «Իմիջիայլոց, Բեն Լադենի ահաբեկչությունից զոհվել է գրեթե 3000 մարդ, իսկ ՔՊ-ի վարած քաղաքականության արդյունքում զոհվել է դրանից մոտ 2000-ից ավելի մարդ: Ուսամա Բեն Լադենին սպանել են ու շպրտել օվկիանոսում մի տեղ՝ առանց գերեզման թողնելով, ՔՊ-ն մինչև հիմա իշխանության է»,- շարունակեց Քոչարյանը:

Հիշեցնենք՝ ավելի վաղ իր ելույթում Վահագն Ալեքսանյանն ասել էր, որ «առանձնապես մեծ տարբերություն չի տեսնում Բագրատ Սրբազանի ու Բեն Լադենի միջև»:

***

«Ուզում եմ հիշեցնել, որ նույնիսկ Ուսամա Բեն Լադենի զուգարանում սպանված ընդդիմախոսի մարմին չեն գտել, իսկ Ռոբերտ Քոչարյանը դեռ ազատության մեջ է»,- արձագանքելով ընդդիմադիր Լևոն Քոչարյանի ելույթին՝ ասաց ՔՊ-ական փոխխոսնակ Վահագն Ալեքսանյանը:

***

Արձագանքելով ՔՊ-ական փոխխոսնակ Վահագն Ալեքսանյանի ելույթին՝ ընդդիմադիր Մեսրոպ Մանուկյանն ասաց. «Զուգարանի դեպքը հիշելուց առաջ ամեն անգամ հիշեք Սոնա Մնացականյանի դեպքը, երբ երկրի ղեկավարը տեսնում է, որ կինն ընկած է գետնին, նույնիսկ բուժօգնություն չեն ցուցաբերում»: