Ըստ Նախագահի գրասենյակի տարածած հաղոդագրության համաձայն, Սերժ Սարգսյանն այսօր շրջել է Երևանի մաթեմատիկական մեքենաների գիտահետազոտական ինստիտուտի «Երևան Էքսպո» ցուցահանդեսային համալիրում հոկտեմբերի 22-24-ը անցկացվող «Էքսպո Ռուսաստան-Հայաստան. 2014» արդյունաբերական վեցերորդ միջազգային ցուցահանդեսի տաղավարներում, ծանոթացել ցուցադրված ապրաքանտեսականուն, զրուցել ցուցահանդեսի մասնակիցների հետ՝ հնարավոր համագործակցության և ընկերությունների զարգացման ծրագրերի մասին:
Ի դեպ, ցուցահանդեսի մասնակիցների թվում շատ են ԲՀԿ ղեկավար Գագիկ Ծառուկյանին պատկանող Մուլտի Գրուպին պատկանող ընկերությունները:
Գագիկ Ծառուկյան-Սերժ Սարգսյան պատահական հանդիպումը ցուցահանդեսի տաղավարներում բացառվում էր, քանի որ ԲՀԿ ղեկավարը երեկ է մասնակցել ցուցահանդեսի բացման արարողությանը, իսկ վաղը, հիշեցնենք` Ազատության հրապարակում նախատեսված Եռյակի հանրահավաքի ընթացքում պատրաստվում է իշխանությունների հասցեին սուր քննադատական ելույթ ունենալ` սոցիալական ուղղվածությամբ:
Նշենք, որ «Էքսպո Ռուսաստան-Հայաստան. 2014» արդյունաբերական վեցերորդ միջազգային ցուցահանդեսի նպատակն է ՀՀ և ՌԴ միջև տնտեսական, գիտատեխնիկական և մշակութային համագործակցության զարգացումը, երկրների միջև կապերի ամրապնդումը, ինչպես նաև համատեղ բիզնեսի, առևտրատնտեսական և ներդրումային հարաբերությունների զարգացումը:
