Հայաստանում են Թուրքիայի 23-րդ գումարման Խորհրդարանի պատգամավոր Ուֆուկ Ուրազը, Թուրքիայի գիտությունների ակադեմիայի անդամ, գրող Ալի Բայրամօղլուն, ակադեմիկոս, գրող, հեռուստահաղորդավար Էրոլ Քաթիրջօղլուն, գրող, ակտիվիստ Սաիդ Չեքինօղլուն:
«Մենք հայ-թուրքական հարաբերությունների կարգավորման, երկու հասարակությունների մերձեցման կողմնակիցներն ենք, ցանկանում ենք, որպեսզի Թուրքիան ճանաչի Հայոց ցեղասպանությունը: Եվ այսօր՝ սեպտեմբերի 21-ին Հայաստանում մեր գտնվելը կարծես թե 2008 թվականին սկսված հայ-թուրքական արձանագրությունների շարունակությունն է»,-լրագրողների հետ հանդիպման ժամանակ ասաց Ալի Բայրամօղլուն:
Շարունակելով հայրենակցին՝ Ուֆուկ Ուրազը նկատեց.«Ուրախ ենք, որ ՀՀ Անկախության օրը Հայաստանում ենք: Ինչպես գիտեք՝ Թուրքիան առաջին պետությունների շարքում է, որ ճանաչեց ՀՀ անկախությունը, բայց խոչընդոտներ եղան ու հարաբերությունները չզարգացան: 2008 թվականի արձանագրությունները մեզ շատ էին ոգևորել: Այս արձանագրություններն առանց նախապայմանների պետք է ընդունվեն: Մեր համագործակցության համար երկրաշարժ անհրաժեշտ չէ»:
«Փակ սահմաններով համագործակցություն հնարավոր չէ»,-ընդգծեց Էրոլ Քաթիրջօղլուն: