Այսօր Հայաստանում Ռուսաստանի դեսպան Իվան Վոլինկինը, լրագրողների հետ զրույցում պատասխանելով հարցին, թե արդյո՞ք հայ-չինական ռազմատեխնիկական համագործակցությունը կարող է ազդել հայ-ռուսական դաշնակցային հարաբերությունների վրա, նշել է.
«Ռուսաստանը և Հայաստանը բարեկամներ են, և այդ բարեկամությունը պետք է լինի ի սրտե, այլ ոչ թե ինչ-որ մեկի դեմ: Ինչ-որ մեկի դեմ բարեկամությունը բարեկամություն չէ»,- ասել է Իվան Վոլինկինը՝ ավելացնելով.
«Հայ-չինական ռազմատեխնիկական համագործակցությունը Հայաստանի որոշումն է. Հայաստանն է որոշում՝ ում հետ համագործակցել, ում հետ՝ ոչ, և Ռուսաստանում ոչ ոք դա չի քննադատում»:
Իսկ Անդրադառնալով Հայաստանի անդամակցությանը՝ Եվրասիական տնտեսական միությանը, դեսպանն ասել է, որ Հայաստանն ազատ կարող է դուրս գալ միության կազմից, բայց միևնույն ժամանակ ինքը կարծում է, որ երկրի բնակչության մեծամասնությունը համաձայն չի լինի, քանի որ տեսնում է Եվրասիական տնտեսական միությունում գտնվելու ակնհայտ առավելությունները: