Մարսելում հունվարի 16-ին տեղի է ունեցել այս շաբաթ սպանված դպրոցական Միքայել Ասատուրյանի հուղարկավորությունը։ «Nouvelles d'Arménie»-ն հայտնում է, որ նրան հրաժեշտ տալու էր գնացել ավելի քան 2000 մարդ։ Թաղման ծիսակարգը կայացել է Մարսելի Պրադոյի պողոտայում  գտնվող հայկական եկեղեցում: 

 Ներկաների թվում էին հայկական կազմակերպությունների առաջնորդները, կրոնական գործիչներ, հայտնի անձինք եւ պաշտոնյաներ։ Ներկա են եղել նաեւ Մարսելի քաղաքապետ Ժան-Կլոդ Գոդենը, նրա տեղակալներ Դիդյե Փարաքյանը եւ Մարտին Վասալը, պատգամավոր Վալերի Բուայեն, տարածաշրջանային խորհրդական Գարո Հովսեփյանը եւ այլ պաշտոնյաներ։ Հայ համայնքը եւս մեկ անգամ իր վշտակցությունն է հայտնել  Ասատրյանների ընտանիքին։

Ինչպես ավելի վաղ հայտնել էինք՝ հունվարի 12-ին  Մարսելում սպանվել է 16-ամյա հայ աշակերտ։ Դեպքը կատարվել էր դասերից հետո։ Միքայելի վրա հարձակվել էին համադասարանցի աղջկա հարազատները, որի հետ Միքայելը փոքրիկ վեճ էր ունեցել։