Փաստաբան Նորայր Նորիկյանը ֆեյսբուքյան իր էջում գրել է. «Օր չկա, որ հրազենի գործադրմամբ որևէ ողբերգական դեպք չգրանցվի: Արդեն չես հասկանում, թե ինչ է կատարվում:
Ի սեր Աստծո՛, լրջորեն վերլուծե՛ք ու հետևություններ արե՛ք այս դեպքերից, հավաքե՛ք մարդկանց ձեռքից անօրինական զենքն ու զինամթերքը, ինչ գնով ուզում է լինի, սահմանափակե՛ք զենք կրողների շրջանակն ու խստացրեք զենքի կրման ու օգտագործման կարգը...»:
Հիշեցնենք, որ երեկ,հոկտեմբերի 19-ին, արտակարգ դեպք է տեղի ունեցել Արարատի մարզում։ Ժամը 11։40-ի սահմաններում Արտաշատի շտապօգնության կայանից ոստիկանության Արտաշատի բաժին ահազանգ է ստացվել, որ «հրազենային վնասվածք, գանգուղեղային տրավմա, կոմա» ախտորոշմամբ իրենց մոտ է տեղափոխվել մի քաղաքացի։
Ոստիկաններն ու քննիչները պարզել են, որ նույն օրը, ժամը 11։00-ի սահմաններում Ոստան գյուղից Քաղցրաշեն գյուղ տանող ճանապարհահատվածում գտնվող Արտաշատ քաղաքի գերեզմանատանը Արարատի մարզի բնակիչ՝ 35-ամյա Յուրիկ Հ-ն, ինքնասպանություն գործելու նպատակով որսորդական հրացանից փորձել է ինքնասպանություն գործել։
Shamshyan.com-ի փոխանցմամբ` այս պահին նա ծայրահեղ ծանր ախտորոշմամբ գտնվում է «Արտաշատ» բժշկական կենտրոնի վերակենդանացման բաժանմունքում՝ բժիշկների հսկողության տակ։ Ոստիկաններն ու քննիչները վիրավորի տատի և պապի գերեզմանում հայտնաբերել են Յու. Հ-ի անվամբ հաշվառված «Իժ-18» տիպի մեկփողանի 32 մմ տրամաչափի որսորդական հրացանը։ Փաստի առթիվ Արարատի մարզային քննչական վարչությունում նյութեր են նախապատրաստվում։