Սահմանին դանդաղ պատերազմ է. եթե մի օր այս պատերազմում պարտվենք, ոչ թե զոհեր կունենանք, այլեւ դիրքեր կկորցնենք:
Այս մասին այսօր` փետրվարի 6-ին, լրագրողների հետ հանդիպմանը հայտարարեց պաշտպանության նախարարի մամուլի խոսնակ Արծրուն Հովհաննիսյանը` պատասխանելով հարցին, թե ինչ իրավիճակ է այս պահին սահմանին եւ ինչի հետ է կապված լարվածությունը:
Նրա խոսքով` իրավիճակը սահմանին հունվարի սկզբից լարված է, եւ եթե ամեն օր հայկական կողմը հակառակորդի ոտնձգությունների չպատասխանի, ապա կսկսենք պարտություններ կրել:
«Փետրվարի 5-ի դեպքն էլ պատասխան ենք տալու»,- ավելացրեց ՊՆ խոսնակը:
Նշենք, որ ադրբեջանական կողմը փետրվարի 5-ի լույս 6-ի գիշերը խախտել է հրադադարի ռեժիմը` կրակելով հիմնականում Տավուշի մարզի սահմանամերձ գյուղերի ուղղությամբ: Փետրվարի 5-ին՝ ժամը 16:15-ի սահմաններում, ՊԲ արեւելյան ուղղությամբ տեղակայված զորամասերից մեկի պահպանության տեղամասի մարտական հենակետում մահացու հրազենային վիրավորում էր ստացել զինծառայող, 1990թ. ծնված Շեքսպիր Մխիթարի Հակոբյանը:
