ՑԱՅԳ ՀԸ փոխանցմամբ՝ ձերբակալված Մնացական Ալեքսանյանն ազատ է արձակվել:
Հիշեցնենք, որ Սառնաղբյուր գյուղի բնակիչ Մնացականը հունվարի 15-ին ձերբակալվել էր Գյումրիում տեղի ունեցած բախումների քրեական գործով և տեղափոխվել Ախուրյանի Ձերբակալվածների պահման վայր:
Դեռ երեկ Մնացականի փաստաբանը ցանկություն էր հայտնել դիմում ներկայացնել ՇՄ դատախազին: Տղային ազատ արձակելու պահանջ էր դրվել նաև ակտիվիստների կողմից: Այսօր նախատեսվում էր նաև ավտոերթ իրականացնել՝ Մնացականին ազատելու պահանջով: Ավտոերթը հետաձգվեց, քանի որ ձերբակալված սառնաղբյուրցին ազատություն ստացավ:
Նշենք, որ Մնացական Ալեքսանյանին ազատ են արձակել առանց մեղադրանք առաջադրելու՝ առանց որևէ խափանման միջոցի ընտրության:
Հավելենք, որ այսօր ժամը 15:00-ին Գյումրիում նախատեսված բողոքի ավտոերթը չեղյալ է հայտարարվում: Քիչ առաջ ֆեյսբուք սոցիալական ցանցից ջնջվել է ավտոերթի մասին իրազեկող էջը: Ավտոերթը կազմակերպվել էր սառնաղբյուրցի Մնացական Ալեքսանյանին ազատ արձակելու պահանջով:
«Մեր պահանջը շատ հստակ էր, ու բավարարված է այն... Շնորհավորում եմ բոլորիս»,- իր էջում հայտնում է երթի կազմակերպիչներից Կարեն Պետրոսյանը:
