«ՕՐՐԱՆ» բարեգործական կենտրոնը հաճախ է կազմակերպում տարատեսակ միջոցառումներ, որոնց գլխավոր նպատակը ֆինանսապես անապահով ընտանիքների երեխաներին և միայնակ տարեցներին օգնելն է: «Օրրան»-ն այդ հարցում ունի աջակիցներ. տարեց տարի ավելանում է այն մարդկանց թիվը, ովքեր պատրաստ են լինել նրանց կողքին:
Asekose.am-ի թղթակցի հետ զրույցում «ՕՐՐԱՆ» բարեգործական կենտրոնի հիմնադիր Արմինե Հովհաննիսյանն ասաց, որ ամեն տարի իրենք փորձում են բարեգործություն անելու յուրօրինակ գաղափարներ մտածել և իրականացնել դրանք` շահագրգռելով իրենց կողքին լինել ցանկացող մարդկանց: Թերևս դրա ապացույցն այն է, որ «ՕՐՐԱՆ» բարեգործական կենտրոնն իր հերթական ընթրիքը կազմակերպել էր ՀՀ-ում Քուվեյթի արտակարգ եւ լիազոր դեսպան Բասսամ Մուհամմադ Ալ-Քաբանդիի առանձնատանը, ով իր տիկնոջ հետ միասին ներկաներին հյուրասիրել են իրենց կողմից պատրաստված արաբական ուտելիքները, իսկ միջոցառման գլխավոր կերակրատեսակ հանդիսացող խորովածի պատրաստողի դերում հանդես էր եկել «ՎիվաՍել-ՄՏՍ» ընկերության գլխավոր տնօրեն Ռալֆ Յիրիկյանը:
Վերջինս ընդունել էր Արմինե Հովհաննիսյանի առաջարկը և միջոցառման նախօրեին, որպես իսկական գլխավոր խոհարար, անձամբ համեմել էր կամ, ինչպես ժողովուրդն է ասում, «բաստուրմա էր դրել» միսը: Asekose.am-ի թղթակիցը հետևել էր, թե ինչպիսին է հայտնի գործարարը խոհանացում: Ավելին` պարոն Յիրիկյանը մեզ հետ զրույցի ընթացքում խոստովանել է, որ տվյալ դերում հանդես գալն իր համար նորություն չէ, որովհետև դեռ տարիներ առաջ իր կնոջը գրավելու համար օգտագործել է իր խոհարարական հմտությունները:
Ձեզ ենք առաջարկում դիտել Asekose.am-ի կողմից պատրաստված տեսանյութը, որի շնորհիվ կարող եք ծանոթանալ Ռալֆ Յիրիկյանի խոհարարական գաղտնիքներին և խորոված պատրաստելու ինքնատիպ բաղադրատոմսին:
Նշենք, որ ՀՀ-ում Քուվեյթի արտակարգ եւ լիազոր դեսպան Բասսամ Մուհամմադ Ալ-Քաբանդիի առանձանատն անցկացրած միջոցառմանը ներկա էին դիվանագետներ, որոնց թվում էին ՀՀ-ում Հնդկաստանի եւ Բրազիլիայի արտակարգ եւ լիազոր դեսպանները, գործարարներ, ինչպես նաև մշակույթի և արվեստի գործիչներ Աշոտ Ղազարյանը, Նունե Եսայանը, Արև Պետրոսյանը, Նադեժդա Սարգսյանը, Էմմին, Նազենի Հովհաննիսյանը, Քրիստինե Պեպելյանը, Սոֆի Մխեյանը, «Արմենիա փրոդաքշն» պրոդյուսերական կենտրոնի հիմնադիր նախագահ Վալերի Սահարյանը և այլոք:
Ուշագրավն այն է, որ միջոցառման հյուրերը` մասնավորապես դեսպանները և գործարար աշխարհի ներկայացուցիչները, ընթրիքին ներկա գտնվելու համար գնել էին տոմսեր, որոնց արժեքը 100. 000 դրամ է: Միջոցառումից գոյացած ողջ գումարն էլ «Օրրան»-ն օգտագործելու է երեխաների և տարեցների կարիքները հոգալու համար:
Առաջարկում ենք բուն միջոցառմանը, խորովածի պատրաստման ընթացքին, ավանդական դարձած «Խորովածը շատ լավ բան է» երգի ներքո գլխավոր կերակրատեսակի մատուցմանը և այլ մանրամասներին ծանոթանալ` դիտելով Asekose.am-ի պատրաստած տեսանյութը և լուսանկարները:
Հեղինակ` Լիլիթ Հակոբյան
Կարող եք դիտել նաև Asekose.am-ի Բացարձակ Արժեք հաղորդումը, որի հյուրը «ՕՐՐԱՆ» բարեգործական կենտրոնի հիմնադիր Արմինե Հովհաննիսյանն է:
72157644675419798
