Արդեն տեղեկացրել ենք, որ դաշնակահար Լևոն Ավագյանը Բարսելոնում մասնակցել է «Maria Canals» 63-րդ հեղինակավոր միջազգային մրցույթին:  Մրցելով  աշխարհի 80 լավագույն դաշնակահարների հետ` հայ երիտասարդն անցել է 3 փուլ և ապրիլի 6-ին` ուշ երեկոյան, մասնակցել մրցույթի եզրափակիչ փուլին Բարսելոնի ֆիլհարմոնիկ նվագախմբի հետ` կատարելով  Ս. Պրոկոֆևի N 3 դաշնամուրային կոնցերտը և գրավելով 1-ին տեղը: Արժանացել է հատուկ մրցանակների`

 1. հանդիսատեսի համակրանք,

2.  իսպանացի կոմպոզիտորի ստեղծագործության լավագույն կատարման համար

3. երիտասարդական ժյուրիի կողմից

4.  ձայնասկավառակ թողարկելու համար

5.  Ֆրանսիայում, Իտալիայում, Չինաստանում, Իսպանիայում և այլ երկրներում մենահամերգներ տալու համար:

Տվյալ մրցույթի մրցանակային ֆոնդը կազմում է 70.000 եվրո: Հավելենք նաև, որ 2-րդ փուլում Լևոն Ավագյանը կատարել է 21-րդ դարի հայ կոմպոզիտոր Կարեն Անանյանի «Սև և սպիտակ» ստեղծագործությունը:

Լևոն Ավագյանը ներկայումս սովորում է Եվրոպայում բարձր վարկանիշ ունեցող Ավստրիայի Գրաց քաղաքի երաժշտության և կերպարվեստի համալսարանում` մագիստրատուրայի դաշնամուրի բաժնի 2-րդ կուրսում  պրոֆեսոր  Միլանա Չերնյավսկայի դասարանում և   փետրվարից աշխատում է նույն համալսարանում` որպես լարային գործիքների նվագակցող:

Լևոն Ավագյանը գերազանցությամբ ավարտել է Ա. Սպենդիարյանի անվան երաժշտական դպրոցը և Երևանի Կոմիտասի անվան պետական կոնսերվատորիան:

Լևոն Ավագյանը  Լիխտենշտեյնի Իշխանության միջազգային երաժշտական ակադեմիայի կրթաթոշակառու է, Գալուստ Գյուլբենկյանի անվան հիմնադրամի կրթաթոշակառու (Պորտուգալիա, Լիսաբոն), «Համահայկական բարեգործական ընդհանուր միություն» (AGBU) ծրագրի կրթաթոշակառու (ԱՄՆ, Նյու Յորք):

2012 թվականին Ավստրիայում թողարկել է «Շուբերտից մինչև Միրզոյան» անվանումով ձայնասկավառակը, որտեղ զետեղված է Էդվարդ Միրզոյանի «Ինտրոդուկցիա» և «Պերպետում մոբիլե» ջութակի  ու  դաշնամուրի համար ստեղծագործությունը` L. Ավագյանի կատարմամբ:

2014 թվականին մասնակցելով  «The Yamaha Music Foundation of Europe» մրցույթին` ստացել է գլխավոր մրցանակը՝ դառնալով հիմնադրամի կրթաթոշակառու:

Մշտապես բարեգործական համերգներով ելույթ է ունենում` Ավստրիայի հայկական համայնքի միջնորդությամբ:

2:44:35-2:45:00

3:21:05-3:22:00

3:27:00-3:27:20